Комида пассажир поезды рельслардан чыгып ауган: вагоннарда 200дән артык кеше булган
Коми республикасының Инта шәһәре янында Воркута – Новороссийск поездының 9 вагоны рельслардан чыгып ауган. Поездда барлыгы 14 вагон булган, анда 232 пассажир булган.
Ауган поездлардагы кешеләрне тәрәзәләрне ватып алганнар. Барлыгы 70 кеше каза күргән. Күпчелеге башын бәрүгә зарлана. 6 кешенең хәле авыр, алар каты травма алган. Аларны поезддан чыгара алмыйлар – кысылып калганнар. Һәлак булучылар юк.
Юл булмау сәбәпле, поезд ауган урынга табиблар килә алмый икән. Шуңа күрә алар поезд белән килгән. «Ашыгыч ярдәм» машинасындагы табиблар килә алмау сәбәбен видеога төшергән.
Сәбәп – тимер юлны су юган, рельслар астындагы грунтны юдырган. «Тимер юл транспортын эксплуатацияләүдә куркынычсызлык кагыйдәсен бозу» маддәсе буенча җинаять эше кузгатылган.