Уфа блогеры Рөстәм Нәбиев юл һәлакәтенә очраган
Уфа блогеры Рөстәм Нәбиев юл-транспорт һәлакәтенә очраган. Тизлекне сакламаган «КамАЗ» машинасы алда барган «Nissan»га бәрелгән, Рөстәмнең «Porsche»сын да эләктергән. Блогерның машинасында кызы София дә булган.
Авариягә очравы турында Рөстәм үзенең телеграм-каналында сөйләде. Блогер сүзләренчә, аның иртән кызын мәктәпкә илтүе булган. Йөк машинасы бик тиз хәрәкәт иткән һәм «Nissan» машинасына килеп кергән, Рөстәмнең машинасына да зыян салган.
Авариядә беркемгә дә җитди зыян килмәгән. «Nissan» руле артындагы хатын-кыз гына җиңелчә җәрәхәтләр алган. Хәзерге көндә юл-транспорт һәлакәтен Дәүләт автоинспекциясе тикшерә.
Рөстәм исә машинасына запас частьтләр кайтарту белән мәшгуль. «Куюы белән бергә 420-450 мең сум тирәсенә төшәчәк. Яңа көзге генә дә 340 мең сум», – дип хәбәр итә ул. Ләкин блогер шуның белән генә котылуына сөенгән. «Тагын да начаррак тәмамлануы бар иде бу хәлнең. «КамАЗ» тагын 5 сантиметрга якынрак килгән булса, минем машинамның бер ягын тулысынча җимергән булыр иде», – ди ул сторисларында.