Ысык-Көлдө автокырсыктан бир үй-бүлөдөн төрт киши каза болду
5-апрелде Ысык-Көл облусунун Балыкчы - Ананьев - Каракол жолунун 84-чакырымында болгон автокырсыктан төрт киши мерт болду. Кырсык саат 00:30 чамасында болгон.
Маалыматка караганда, Чүй облусунун 42 жаштагы тургуну К.М. айдап бараткан «Фольксваген-Гольф-3» автоунаасы чыгыштан батышты көздөй баратып «Тойота-Ист» унаасы менен кагышкан. Экинчи автоунааны Түп районунун 56 жаштагы тургуну Д.Ш. айдап бараткан.
Кырсыктын кесепетинен окуя болгон жерден төрт киши көз жумган. Алар бир үй-бүлөнүн мүчөлөрү, «Фольксваген-Гольф-3» автоунаасынын айдоочусу, анын аялы, үч жана беш жаштагы уулдары болгон.
Бул автоунаадагы башка жүргүнчүлөр — 37 жаштагы К.М. жана айдоочунун алты жаштагы кызы Ысык-Көл райондук ооруканасынын хирургия бөлүмүнө жаткырылган. Ошондой эле «Тойота-Ист» автоунаасынын жүргүнчүсү Б.З. ооруканада дарыланууда.
Бул факт Кылмыштар менен жоруктардын бирдиктүү реестрине катталып, сотко чейинки тергөө иштери башталды. Тиешелүү экспертизалар да дайындалган. (AsM)