Франце 400 000 соьманна хьонка эцна воьдуш лаьцна Нохчийчоьнан вахархо
Нохчийчоьнан вахархо сацийна шен машенца Оьрсийчоьнан-Украинан дозанехь 20 гали хьонка хьош. Бахьана ду шегара кир цо деклараце цаязбар.
"Цо иза эцна шен даймахкахь, Украинерхула транзитца хьош хилла Францерчу гергарчарна. Ткъа цунна хIиттийна кехаташ а доцуш хилла и стаг", - хаам бо "Чечня сегодня" агенталло дозанехула чекхбоккхучу кир тIера ял йоккхучу Белгород-кIоштарчу хьукматан пресс-векалтанна тIе а тевжаш.
Хьош болчу хьонкин мах хилла 400 эзар сом, боху урхаллехь. Машенах хьовсуш, "Нехотеевка" дозан ханехь карийна иза.
Магенан дена дуьхьал административан гIуллакх гIаттийна, ткъа хьонка дIабаьккхина, тоьшалла санна дIаIалашбина ханна кир латточу камераш чу.
Хьонка – акха саьмарсекх бу, нохчийн къоман даар. Цунах цхьацца кхачанаш кечбо. Соьлжа-ГIалахь дIахьо хьонкин фестивалаш.
Регионехь хьонкано Iаьнан-бIаьстенан цамгаршна дуьхьало еш лору. Цо коронавирусна дуьхьало йо аьлла хетачу бахархошлахь пандемин хьалхарчу муьрехь, 2020-чу шеран бIаьста, Къилбаседа Кавказехь цIеххьана лакхабелира хьонкин мах.