Ադրբեջանը որևէ սադրանքի չի կարող գնալ՝ առանց աջակցություն և թույլտվություն ստանալու. Մանվել Սարգսյան
Հայկական կողմի խնդիրն է պատրաստ լինել ցանկացած զարգացման և միջազգային ասպարեզում թույլ չտալ Ադրբեջանին հզորացնել քաղաքական շեմը:
Tert.am-ի հետ զրույցում նման տեսակետ հայտնեց Ռազմավարական և ազգային հետազոտությունների հայկական կենտրոնի (ՌԱՀՀԿ) տնօրեն Մանվել Սարգսյանը, ով վստահ է, որ Ադրբեջանը որևէ սադրանքների չի կարող գնալ՝ առանց աջակցություն և թույլտվություն ստանալու:
«Ի վերջո, հասկանալի է, որ Ադրբեջանն ուզում է ստանալ աջակցություն, մեր խնդիրն է թույլ չտալ, որ որևէ մեկը Ադրբեջանին սադրի գնալ նման քայլերի, ինչն անընդհատ պետք է արվի միջազգային կառույցներում»,- ասաց նա:
Մանվել Սարգսյանի դիտարկմամբ՝ մի քանի պատճառ կա Ադրբեջանում այսօր մեկնարկած հնգօրյա զորավարժությունների համար, որոնց 25 հազար զինծառայող է մասնակցում:
«Առաջինը պայմանավորված է Ադրբեջանի ընտրություններով, և բնական է, որ լավ ֆոն է ստեղծվում նոր հակահայկական հիստերիայի համար, որպեսզի ժողովրդին հնազանդեցնեն, մոբիլիզացնեն, մոռանան իրենց խնդիրները, որ կարողանան իրենց ընտրություններն անցկացնել: Դա միանշանակ է ու պարզ երևում է»,- ասաց Սարգսյանը:
Բացի դրանից, ըստ Սարգսյանի՝ կա շատ ավելի էական հանգամանք: Նա հիշեցրեց բոլորովին վերջերս ՀԱՊԿ միացյալ շտաբի պետի հայտարարությունը, որ ՀԱՊԿ-ը պատերազմի պարագայում չի օգնի Ղարաբաղին:
«Նման հայտարարությունը՝ հանկարծակի և բավական կտրուկ, կարծում եմ՝ շատ էական է, և դրա պատճառները պետք է գտնել, թե ինչու են նման հայտարարություն արել: Կարծում եմ` Ադրբեջանի համար դա շատ լավ առիթ էր նորից զենք ցուցադրելու, անընդհատ այդ հայտարարություններն անելու, թե մենք պատրաստ ենք ռազմական ճանապարհով մեր խնդիրները լուծել: Սա, միանշանակ, մեծ նշանակություն ուներ, որ հենց հիմա են դա որոշել իրենք անել, և իհարկե, պետք է շատ լուրջ վերաբերվել այդ ամենին, խնդիրը կոնկրետ զինավարժության հետ կապված սադրանքը չէ, խնդիրը խուճապային մթնոլորտ ստեղծելն է»,- ասաց նա:
Ռազմավարական և ազգային հետազոտությունների հայկական կենտրոնի տնօրենի խոսքով՝ Ադրբեջանը չի հրաժարվի իր մտադրությունից, և նա անընդհատ ամեն առիթ կգտնի՝ իր ժողովրդին երաշխիքներ տալու:
Հարցին, թե զորավարժությունների ֆոնին ինչպես է գնահատում, օրինակ, Արցախի հերոս, գեներալ-մայոր Արկադի Տեր-Թադևոսյանի (Կոմանդոս) այն հայտարարությունը, որ եթե 2016-ին Ռուսաստանը խնդիր ուներ, դրա համար թույլ տվեց Ադրբեջանին գնալ ապրիլյան պատերազմի, հիմա չի թողնի, Մանվել Սարգսյանը նշեց, որ պատերազմի վտանգից ելնելով՝ դրանք զուտ տեսակետներ են:
«Իհարկե, բոլորն էլ հասկանում են այն հանգամանքը, որ Ադրբեջանը որևէ գործողություն անել, որոշում ընդունել չի կարող, մինչև աջակցություն, թույլտվություն չստանա: Դրա համար էլ մարդիկ տեսակետներ են հայտնում: Միանշանակ, շատ լավ պետք է դիտարկել Ռուսաստանին, թե այս օրերին հատուկ ինչ շահագրգռվածություններ ունի, իսկ թույլատրել- չթույլատրել, միանշանակ դժվար է ասել, թե ՌԴ-ն ապրիլին ինչու է թույլ տվել և ինչու հիմա չպետք է թույլ տա: Անընդհատ այդպես է եղել՝ Հայաստանը ՌԴ-ի ձեռքին գործիք է եղել, որի միջոցով նա Թուրքիայի, Ադրբեջանի հետ անընդհատ հարաբերություններ է հիմնում, այն հարաբերությունները, որոնցով ՌԴ-ի վերաբերմունքը դեպի Հայաստան կարող է ստորադասվել. դրա համար պետք է հասկանալ` ինչ խնդիրներ կան, դրանք ազդեցության ձևեր են ՝ մե՛կ Հայաստանին է ձեռք տալիս, մե՛կ Ադրբեջանին ինչ-որ քայլերի դրդում, դրանք ընդհանուր շղթայի մեջ են»,- ասաց Սարգսյանը՝ հավելելով,որ նույն շղթայի մեջ պետք է դիտարկել նաև Արևմուտքի վերաբերմունքը ՌԴ-ի նկատմամբ, առաջին հերթին հենց Միացյալ Նահանգերի կոշտ քաղաքականությունը, թե ինչպես կանդրադառնա Ղարաբաղի խնդրին: