Kyivde Rusiye ilhaqı ve Qırımdaki repressiyalar aqqında kitapnı taqdim etecekler
Kyivde iyün 5-te Qırımnıñ Rusiye tarafından ilhaqı ve yarımadadaki repressiyalar aqqında «Boz zona»nıñ insanları» kitabı taqdim etilecek. Kitapnıñ muellifleri – Qırım jurnalisti, Qırım.Aqiqat muellifi Anna Andriyevskaya ve Ukraina milliy hatıra institutınıñ mutehassısı Yelena Halimon.
Kitap, Qırım sakinlerine qarşı Rusiye telükesizlik hadimleri ve mahsus hizmetleri tarafından repressiyalarnıñ başlanmasından soñki devirni qaplap ala.
Taqdim tedbiriniñ teşkil eticileri: «Muellifler Anna Andriyevskaya ve Yelena Halimonnıñ leyhasında «Qırım baari» tarihınıñ, Rusiye propagandası tarafından iç añılmağan ya da qasten deñiştirilgen qısmı aqqında aytıla. Elliden ziyade ikâye, yarımadanıñ ilhaqı qansız edi ve «Qırım sakinleri qarşılıq köstermege ıntılmayıp, göñülli olaraq Rusiyeni sayladılar», degen mifniñ yalanlığını isbatlay», – dep bildireler.
İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler keçire.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.