Պատերազմը կանխարգելող, քաղաքագիտության տեսանկյունից բացառիկ. Լևոն Շիրինյանը՝ Փաշինյանի հայտարարության մասին
Վարչապետ Նիկոլ Փաշինյանը կատարում է պատերազմը կանխարգելող հայտարարություն, քաղաքագիտության տեսանկյունից բացառիկ, ոչ թե բլեֆի արժեք ունեցող: Այս մասին Tert.am-ի հետ զրույցում ասաց քաղաքագետ, քաղ. գիտ. դոկտոր, պրոֆեսոր Լևոն Շիրինյանը` անդրադառնալով վարչապետ Նիկոլ Փաշինյանի հայտարարությանը, թե ՌԴ-ն թույլ չի տա պատերազմի վերսկսում մեր տարածաշրջանում:
«Նիկոլ Փաշինյանը ՌԴ-ին ասում է, եթե դաշնակից ես,ապա պատերազմի վերսկսում թույլ չպիտի տաս: Հայաստանն իր արտաքին քաղաքականության, անվտանգության նկատառումները ճշգրտում է համապատասխան իր ազգային, պետական շահերի, ինչը երեք նախագահներից ոչ մեկը չի արել: Քաղաքականության մեջ ճիշտը տեսակետի ուղիղ շարադրանքն է, քան խաբելը: Շատ հստակ ասվում է, որ հասկանում են որպես դաշնակից ինչ պարտավորություններ ունեն և պետք է դրանք կատարեն»,- մանրամասնեց Լևոն Շիրինյանը:
Քաղաքագետի խոսքով` վարչապետը լավ տիրապետում է քաղաքական պատմությանը, գիտի՝ ՌԴ-ն թուրք-ադրբեջանական գործոնը օգտագործում է Հայաստանի զարգացումը կանխելու համար, ինչն անթույլատրելի է:
«Մի բան պիտի նկատի ունենանք առաջինը այն, որ հակառակորդը թուրքն է, դաշնակիցն էլ ռուսի պես բարեկամն է: Բայց այս պահին ընդհանուր իրադարձության շրջանակներում պատերազմի վերսկսումը քիչ հավանական է, որովհետև Հայաստանը թավշյա հեղափոխությունից հետո կոռուպցիայի դեմ պայքար է մղում, փորձում է արմատախիլ անել, բանակի մարտական ոգին բարձրացվում է, գեներալիտետի որակը փոխվում է, Հայաստանի մարտական ոգին շատ ավելի բարձր է քան եղել 3 նախագահների ժամանակահատվածում, այդպիսի դեպքերում, նման բանակի հետ կռվելուց խուսափում են: Մեր հնարավորությունները, փոփոխությունները զսպան մեխանիզմ են դառնում»:
Լևոն Շիրինյանը նաև կարևոր համարեց Նիկոլ Փաշինյանի մեկնաբանությունը Լևոն Տեր –Պետրոսյանի հետ հանդիպման, հնարավոր փոխզիջումների հարցերի վերաբերյալ:
«Ասաց, որ իրեն տեսակետ, տեղեկություն հայտնեց, որի մեջ իր համար նորություն չկար: Ենթադրում եմ, որ գնացել էր համոզելու, որ տարածք հանձներ, բայց Նիկոլ Փաշինյան ասաց, որ այդ հարցը պիտի ժողովուրդը որոշի, փաստորեն ասաց, որ հանրաքվեով է որոշվելու, հայրենիք չի հանձնելու: Այդ տեսակետը բխում է Հայաստանի Հանրապետության պետական, ռազմական շահերից: Սա արմատական շրջադարձ է դեպի ազգային-պետական շահերի ճանաչողություն և գործադրում:Պարտվողականությունը, որը սերմանվել է նախորդ նախագահների կողմից, ոչնչացվել է»,- եզրափակեց Լևոն Շիրինյանը: