მოსკოვში გაიმართა სერგეი ლავროვისა და ჯავად ზარიფის შეხვედრა
რუსეთის საგარეო საქმეთა სამინისტროს ოფიციალური საიტის თანახმად, დახურულ კარს მიღმა ლავროვმა და ზარიფმა იმსჯელეს ირანის ბირთვული პროგრამის გარშემო შექმნილი საერთაშორისო ვითარებისა და სპარსეთის ყურის უსაფრთხოებასთან დაკავშირებული საკითხების თაობაზე.
„ერთ-ერთ ყველაზე აქტუალურ თემას წარმოადგენს ირანის ბირთვული პროგრამის მოწესრიგების თაობაზე მიღწეული „მოქმედების ერთობლივი ყოვლისმომცველი გეგმის“ (JCPOA) გადარჩენა. რუსეთი და ირანი გულწრფელად არიან დაინტერსებული იმით, რომ JCPOA-ს შეთანხმებაზე ხელმომწერი ყველა მხარე დაუბრუნდეს თავის მიერ აღებული ვალდებულების შესრულებას“, - განაცხადა სერგეი ლავროვმა ორმხრივი მოლაპარაკების დაწყების წინ.
საერთაშორისო ვითარება ირანის ბირთვული პროგრამის გარეშე კვლავ დაიძაბა მას შემდეგ, რაც აშშ-ის ყოფილი პრეზიდენტის, დონალდ ტრამპის გადაწყევტილებით ვაშინგტონმა დატოვა საერთაშორისო შეთანხმება და კვლავ აამოქმედა მკაცრი ეკონომიკური სანქციები ირანის წინააღმდეგ.
ირანის საგარეო საქმეთა მინისტრმა რუსეთს უწოდა "სტრატეგიული პარტნიორი“ და აღნიშნა, რომ მოსკოვში აპირებს ისაუბროს ასევე მთიანი ყარაბაღის კრიზისისა და საომარი მოქმედებების შემდეგ რეგიონში არსებულ ვითარებაზე.
„რუსეთის ფედერაციისა და ბატონ პუტინის ძალისხმევით ეს ომი დასრულდა, მიღწეულია გარკვეული შეთანხმებები, რომელთა რეალიზება, ჩვენი აზრით, ორმხრივად სასარგებლოა, განსაკუთრებით ტრანზიტის სფეროში თანამშრომლობის განვითარების მიმართულებით“, - განაცხადა ზარიფმა.
ირანის საგარეო საქმეთა მინისტრი, მოჰამად ჯავად ზარიფი 25 იანვარს ჩავიდა ბაქოში, სადაც ის შეხვდა აზერბაიჯანის პრეზიდენტს, ილჰამ ალიევს. იქიდან კი 26 იანვარს რუსეთში გაეშურა.
რეგიონული ტურნეს ფარგლებში ჯავად ზარიფი რუსეთიდან 27 იანვარს საქართველოს ეწვევა და შემდეგ ჩავა სომხეთში, ასევე თურქეთში.