Абарона журналістак „Белсата” Андрэевай і Чульцовай абскардзіла прысуд
Абарона журналістак тэлеканала „Белсат” Кацярыны Андрэевай і Дар’і Чульцовай абскардзіла прыгавор суда Фрунзенскага раёна, які пакараў іх двума гадамі пазбаўлення волі ў калоніі агульнага рэжыму. Як паведаміў у „Фэйсбуку” адвакат Андрэевай Сяргей Зікрацкі, апеляцыйная скарга ў Менскі гарадскі суд пададзеная 26 лютага.
Паводле яго слоў, асноўныя тэзісы скаргі грунтуюцца на тым, што падзеі 15 лістапада 2020 года, калі былі затрыманыя журналісткі, нельга назваць дзеяннямі, што груба парушаюць грамадскі парадак, а міжнародна-прававыя нормы „гарантуюць грамадзянам права на мірныя сходы”. Адвакат падкрэсліў, што калі пратэстоўцы запоўнілі ўсю прастору для пешаходаў і тэрыторыі ля дамоў на „плошчы Перамен” (двор на вуліцы Чарвякова), яны з-за сваёй шматлікасці былі вымушаныя выйсці на праезную частку.
„У судовым пасяджэнні не здабыта ні аднаго доказу, які сведчыць пра тое, што такі спантанны выхад на праезную частку быў арганізаваны кім бы там ні было”, — адзначыў Зікрацкі.
Таксама, звярнуў увагу адвакат, судом не ўстаноўлена фактаў непадпарадкавання прадстаўнікам улады, хоць гэта „неабходная ўмова для прыцягнення да адказнасці па гэтым артыкуле” (ч. 1 арт. 342). „Нам не расказалі, хто і якія законныя патрабаванні прад’яўляў і ў чым выяўлялася непадпарадкаванне„, — заўважыў абаронца.
Акрамя таго, дадаў ён, суд не ўстанавіў, што менавіта дзеянні ўдзельнікаў масавай акцыі пацягнулі парушэнне работы транспарту. „Транспарт не хадзіў, гэта факт. Але чаму ён не хадзіў, гэтае пытанне прынцыповае для доказу законнасці прыцягнення да адказнасці па дадзеным артыкуле. Пратэстоўцы выйшлі на праезную частку і заблакавалі рух? Ці праваахоўныя органы перакрылі праезную частку, каб не даць пратэстоўцам прайсці? А можа, праваахоўныя органы перакрылі праезную частку, каб арганізаваць бяспеку ўдзельнікаў масавага мерапрыемства?” — адзначыў Зікрацкі.
Паводле яго слоў, суд не толькі не ўсталяваў прычыны і храналогію абмежавання руху транспарту, але і не задаволіў хадайніцтва абароны, якія маглі б дапамагчы адказаць на гэтыя пытанні.
Як падкрэслівае Зікрацкі, заключэнні лінгвістаў і псіхолага сведчаць аб тым, што ў выказваннях журналістак няма прыкмет арганізацыі дзеянняў, якія груба парушаюць грамадскі парадак. Паводле слоў адваката, ва ўчынках журналістаў не было і актыўнага ўдзелу ў дзеяннях, што груба парушаюць грамадскі парадак. „У прысудзе напісана, што Кацярына і Дар’я публічна выкрыквалі лозунгі і рабілі гучныя воплескі рукамі. Вельмі хацелася ўдакладніць, як яны гэта рабілі, трымаючы ў руках мікрафон і камеру?” — заявіў ён.
„Мы абсалютна ўпэўненыя ў невінаватасці Кацярыны і Дар’і. Упэўненыя, што яны не толькі не здзяйснялі злачынства, а выконвалі свае прафесійныя абавязкі, прычым выконвалі іх добра, — заявіў адвакат. — Нягледзячы на прысуд першай інстанцыі, мы не адчайваемся і працягваем барацьбу”.
Журналісткі польскага тэлеканала „Белсат” Андрэева і Чульцова былі затрыманыя 15 лістапада 2020 года пасля жывога эфіру (стрыму) з месца разгону сілавікамі дэманстрантаў — на сімвалічнай „плошчы Перамен”. Судом Фрунзенскага раёна Менска яны прызнаныя вінаватымі паводле ч. 1 арт. 342 Крымінальнага кодэкса (арганізацыя групавых дзеянняў, якія груба парушаюць парадак і звязаныя з яўным непадпарадкаваннем патрабаванням прадстаўнікоў улады, што мела вынікам парушэнне працы транспарту, актыўны ўдзел у такіх дзеяннях) і прыгавораныя да двух гадоў пазбаўлення волі ў калоніі агульнага рэжыму.