ტიკარაძე არ გამორიცხავს ჯანდაცვის სამინისტრომ უჩივლოს „კოვაქს პლატფორმას" 

„ინტერპრესნიუსის“ მიერ გავრცელებული ინფორმაციის საპასუხოდ საქართველოს ჯანდაცვის სამინისტრომ  უკვე მიმართა „კოვაქს პლატფორმას". სამაუწყებლო კომპანია „რუსთავი 2"-ის ეტერში ჯანდაცვის მინისტრმა ეკატერინე ტიკარაძემ არ გამორიცხა, რომ სამინისტრომ „კოვაქს პლატფორმას" უჩივლოს.   


„ამ სტატიის საპასუხოდ ჯანდაცვის სამინისტრომ დღესვე მიმართა „კოვაქს პლატფორმას". ჩვენ მოვთხოვეთ მათ პასუხი იმაზე, რატომ გაეცა „ინტერპრესნიუსს" ასეთი პასუხი, ვინაიდან ყველა იმ არსებულ კომუნიკაციაში, რომელიც ჩვენ დავიწყეთ „კოვაქს პლატფორმასთან" 18 სექტემბრის შემდეგ, მსგავსი გადაცდომა მათი მხრიდან წერილობით [არ მიგვიღია], რომ ჩვენ რაიმე შეცდომა დავუშვით, ან დროული პასუხი მათ არ გავეცით. „კოვაქს პლატფორმა" ერთხელ უკვე მოხვდა მსგავს გაუგებრობაში ბოსნიასთან მიმართებაში, რის გამოც ბოსნიამ „კოვაქს პლატფორმას" უჩივლა, შესაბამისად, ჩვენ ამ ეტაპზე ველოდებით, რა თქმა უნდა, განმარტებებს იმის თაობაზე, რომ მათ უარყონ ეს ბრალდება საქართველოს ჯანდაცვის სამინისტროზე, ვინაიდან მსგავსი რამ ნამდვილად არ ყოფილა. შემდეგ გავაგრძელებთ საჭირო კომუნიკაციას", - თქვა ტიკარაძემ. 


შეკითხვაზე, შესაძლებელია თუ არა, საქართველომაც უჩივლოს „კოვაქს ოპლატფორმას"? ჯანდაცვის მინისტრი პასუხობს: „გამომდინარე იქიდან, რომ აქ არის რეპუტაციულ რისკებზე საუბარი, მე ამასაც არ გამოვრიცხავ. ყველაფერი ჩვენდა სამწუხაროდ, რომ საქართველოში არსებული მძიმე პოლიტიკური მდგომარეობიდან გამომდინარე გამოყენებულია ჩვენი ოპოზიციური ოპონენტების მხრიდან იმის ესკალაციისთვის, რომ საქართველოში მოხდეს პოლიტიკური დიდი დაძაბულობა და პოლარიზაცია. ამას ჯანდაცვის სამინისტრო ნამდვილად არ დაუშვებს". 


საინფორმაციო სააგენტო „ინტერპრესნიუსის“ მიერ გავრცელებული ინფორმაციის თანახმადაც, „კოვაქსის“ ცნობით, თებერვალში ვაქცინა მხოლოდ იმ ქვეყნებში გაიგზავნა, რომლებმაც მათ მიერ გათვალისწინებული კრიტერიუმები დააკმაყოფილეს.