Mbi 90 njerëz të vdekur nga zjarri në një spital të Irakut

Numri i viktimave nga zjarri, që përfshiu një spital për trajtimin e pacientëve me koronavirus në Irak, u rrit në 92.


Më herët u raportua për së paku 60 persona të vdekur.


Zyrtarët shëndetësorë thanë se rreth 100 vetë janë të plagosur.


Zjarri në spitalin e qytetit Nasiria dyshohet se u shkaktua nga shpërthimi i një rezervuari me oksigjen.


Nasiria ndodhet rreth 375 kilometra në jug të kryeqytetit Bagdad.


Zyrtarët shëndetësorë thanë se zjarri u vu nën kontroll dhe se operacionet e kërkimit janë duke vazhduar.


Kryeministri Mustafa al-Kadhimi urdhëroi arrestimin e menaxherëve të shëndetësisë dhe mbrojtjes civile, përfshirë menaxherin e repartit të izolimit të pacientëve me koronavirus, tha zyra e tij.




Në muajin prill, një zjarr i shkaktuar nga shpërthimi i një rezervuari me oksigjen në një spital në Bagdad vrau së paku 82 njerëz dhe plagosi 110 të tjerë.


Koronavirusi në Irak ka infektuar mbi 1.4 milion njerëz.


Prej tyre, mbi 17,500 pacientë kanë humbur jetën.