Павел Латушка: Я не з’яўляюся прадстаўніком апазіцыі
З былым міністрам культуры Беларусі, цяперашнім кіраўніком антыкрызіснага кіравання наш карэспандэнт Міхась Андрасюк размаўляў пра магчымыя перамовы Лукашэнкі з апазіцыяй і пра тое, хто ўсё ж належыць да гэтай апазіцыі.
РР: Вы зараз адзін з самых вядомых прадстаўнікоў апазіцыі, але ж вы зараз не ў Беларусі, таму і не партнёр для перамоваў.
Павел Латушка: Давайце разбірацца, хто такія патрыёты на сёння. Ці Эйсмант, якая падазраецца ў крымінальных злачынствах, забойстве Рамана Бандарэнкі, і гэта высветліў і пацвердзіў “Байпол”, ініцыятыва былых следчых, і даказаў гэта праз фотаздымкі, праз тэлефонныя размовы, відэафіксацыю? Ці з’яўляецца патрыётам Баскаў, які дапамагаў ёй гэта ажыццявіць? Ці з’яўляюцца патрыётамі ўсе тыя, хто сёння знаходзіцца пры ўладзе, і якія фактычна дзеля таго, каб захаваць уладу, ідуць на тое, каб забіваць беларусаў, трымаць іх у турмах і катаваць іх там. І тыя, хто падтрымлівае іх, знаходзячыся пры ўладзе, яны таксама патрыёты? У чым патрыятызм?
Патрыятызм – гэта дбаць пра незалежнасць сваёй краіны, пра дабрабыт, пра тое, каб людзі былі свабоднымі, вольнымі, каб яны самі вырашалі свой лёс. То бок тут пытанне патрыятызму – гэта першае, што трэба адкінуць.
Ці гатовы я дыскутаваць з Наталляй Эйсмант? Не, не гатовы. Бо яна – злачынца. Яна, канешне, будзе прадстаўленая суду, яна будзе адказваць перад судом. Не я вырашаю, ці будзе яна пакараная, гэта павінны зрабіць незалежны суд. І Нюрнбергскі працэс над такімі, як Наталля Эйсмант, і ўсімі іншымі на чале з Лукашэнкам адбудзецца, прыйдзе час.
А што тычыцца размаўляць з тымі, хто ў Беларусі? Давайце з трэцяга пункту гледжання паглядзім. Дык давайце размаўляць з Віктарам Бабарыкам, з Марыяй Калеснікавай, Мікалаем Статкевічам, Паўлам Севярынцам. І гэты спіс мы сёння можам працягнуць на 872 прозвішчы палітычных зняволеныз у Беларусі. Мы ведаем, што іх тысячы і 5000 крымінальных спраў распачата. Ці з гэтымі людзьмі яны гатовыя размаўляць? Не. Бо іх усіх пасадзілі за краты. Дык з кім размаўляць? З Васкрасенскім ці з Гайдукевічам, якія ні слова не пярэчуць Лукашэнку? Яны яму падпарадкаваныя і абсалютна на сто адсоткаў падтрымліваюць Лукашэнку.
А апазіцыя ад слоў “мець іншую пазіцыю” да ўладаў, іншае стаўленне. Дык вось, яны не з’яўляюцца апазіцыяй. А я скажу яшчэ і больш – і я не з’яўляюся прадстаўніком апазіцыі, але я сярод тых беларусаў, якія сёння з’яўляюцца большасцю ў краіне і якія не хочуць Лукашэнкі пры ўладзе. Бо ён здрадзіў Беларусі, учыніў столькі злачынстваў, у яго кроў на руках беларусаў, якія былі забітыя ў мінулым годзе і яшчэ раней. Тых беларусаў, якіх катуюць у турмах. Ён той чалавек, які пачаў гібрыдную вайну супраць еўрапейскага звязу. Так што мы не апазіцыя – мы большасць.
РР: Можна сказаць, што зараз у апазіцыі Аляксандр Лукашэнка, у апазіцыі да праўды, да беларускай Канстытуцыі, у апазіцыі да здаровага розуму таксама.
Павел Латушка: Так, вы маеце рацыю, бо гэты чалавек хворы і хворы на ўладу. Гэта хвароба стагоддзяў, мы, на жаль, бачылі гэта ў дваццатым стагоддзі, мы бачылі гэта і раней. Калі дыктатары прыводзілі да вельмі цяжкіх сітуацый як унутры краіны, так і звонку, калі яны пачыналі войны.
Гэта чалавек, які распачаў вайну супраць беларускага народу, і ён пачынае вайну супраць суседзяў. Гэта чалавек, які кіруецца толькі адным, – захаваць сваю ўладу.
Цалкам гутарку слухайце ў далучаным файле:
Беларускае Радыё Рацыя