ოკუპირებულ ცხინვალის რეგიონში საარჩევნო უბნების დახურვის შემდეგ პირველი განცხადება გააკეთა ცესკოს თავმჯდომარემ ემილია გაგიევამ. ოსურ მედიასთან საუბარში მან განაცხადა, რომ დე ფაქტო საპრეზიდენტო არჩევნების მეორე ტურში პარტია „ნიხასის“ თავმჯდომარე ალან გაგლოევი ლიდეროს. მისი თქით დათვლილია ბიულეტენების 18 პროცენტი და აქედან ალან გაგლოევს ხმა მისცა 3686-მა ამომრჩეველმა, 59-მა პროცენტმა, ხოლო მოქმედ ე.წ პრეზიდენტს ანატოლი ბიბილოვს 2274-მა ამომრჩეველმა-37 მა პროცენტმა. ყველას წინააღმდეგ ხმა 236 ადამიანმა მისცა. ე.წ ოპოზიციის ლიდერი ალან გაგლოევი მომხრეებთან ერთად ცხინვალის ცენტრალურ მოედანზე მივიდა და გამარჯვებას აღნიშნავს, ბიბილოვს ჯერ განცხადება არ გაუკეთებია, თუმცა სოციალურ ქსელში ვრცელდება მისი მომხრეების კომენტარები იმის შესახებ, რომ გაგლოევი არჩევნებს აყალბებდა. გაგლოევის მომხრეები კი პირიქით, ბიბილოვს ადანაშაულებენ პროვოკაციების მოწყობასა და არჩევნების შედეგების გაბათილების მცდელობაში. მოედანზე შეკრებილები აცხადებენ, რომ ხმებს დაიცავენ და ბიბილოვს დამარცხების აღიარებისკენ მოუწოდებენ.
დე ფაქტო რესპუბლიკის ძალოვანი უწყებები საარჩევნოდ და სადღესასწაულო დღეებში საგანგებო რეჟიმზე გადაიყვანეს. დე ფაქტო შინაგან საქმეთა სამინისტროს 600-ზე მეტი თანამშრომელი 8-9 მაისს საზოგადოებრივი წესრიგის დაცვას და უსაფრთხოებას უზრუნველყოფს. დე ფაქტო საპრეზიდენტო არჩევნების მეორე ტურზე დასაკვირვებლად 25 დამკვირვებელია აკრედიტირებული რუსეთიდან, ოკუპირებული აფხაზეთიდან, დონეცკის და ლუგნსკის ოკუპირებული ე.წ რესპუბლიკებიდან.