Арман Жұмагелдиев Қаңтар оқиғасы кезіндегі "азаптау" бойынша істе жәбірленуші деп танылды

Қаңтар оқиғасы кезінде "қылмыстық топ құрды" деп айыпталып, қамалған Арман Жұмагелдиев ("Дикий Арман" деген лақап атпен де мәлім – ред.) Алматы қаласы полиция департаменті қызметкерлеріне қарсы "азаптау" бабы бойынша істің қозғалуына қол жеткізді. Бұл жөнінде Orda.kz сайты хабарлады.


Адвокаты Олег Черновтың айтуынша, іс бойынша Алматы полиция департаментінің қызметкерлері күдікті деп танылған.


Оның сөзінше, азаптау бойынша тергеуді бастауға 2022 жылғы 7 қаңтарда "Ритц Карлтон" қонақүйінің қауіпсіздік қызметі түсірген Жұмагелдиевті ұстау видеосы себеп болған. Черновтың сөзінше, видеода арнайы жасақ Жұмагелдиевті қатыгездікпен ұрып-соғып жатқаны көрінеді. Видеоны қонақүйдің қауіпсіздік мамандары түсірген.


"Видеожазбаны менің қорғауымдағы азамат айыпталушы ретінде өтіп отырған қылмыстық іс материалдарымен танысып жатқан кезде көріп қалдық. Бұрын ондай видео барын білген жоқпыз. Бірақ Арман ұстау кезінде ешқандай негіз болмаса да, өзін аяусыз ұрып-соққанын айтқан. Полицейлердің озбырлығына дәлелді жуырда ғана алып, сыбайлас жемқорлыққа қарсы іс-қимыл агенттігіне өтініш түсірдік" деді Чернов.


Адвокаттың айтуынша, Жұмагелдиевтің азапталуына қатысты іс былтыр көктемде тергелгенімен, "дәлел болмағандықтан" жабылып қалған. Қайта шағымданып жатып, "азаптау" бабы бойынша тергеу жүргізілуіне қол жеткізген.


Іс бойынша сотқа дейінгі тергеп-тексеруді сыбайлас жемқорлыққа қарсы қызмет жүргізеді.


37 жастағы Арман Жұмагелдиев былтыр 7 қаңтарда қамауға алынған. Оған "заңсыз қару сақтады", "жаппай тәртіпсіздік ұйымдастырды", "ұйымдасқан қылмыстық топ құрып, басшылық етті" және "қарақшылықпен шұғылданды" деген айыптар тағылған. Жұмагелдиев бұл айыптарды мойындамайды.