Белгеч: Майда эштән китү отышлы түгел
Май аенда өстәмә ял көннәре күп булу сәбәпле, эштән китү отышлы түгел. Бу хакта «Работа.РУ» генераль директоры урынбасары Александр Ветерков, «СберПодбор» һәм «Подработка» сервисларының операцион директоры сөйләде, дип яза RT.
«Эштән китү өчен эш көннәре аз булган айларны сайламау яхшырак. Май аенда өстәмә ял көннәре күп булу сәбәпле, эштән китү отышлы түгел: азрак вакыт эшләп, гадәти күләмдәге хезмәт хакы алырга мөмкин», - дип аңлатты эксперт.
Шуңа бәйле рәвештә ул май аенда нибары 18 эш көне булачагын искәртте. Җитештерү календаре нигезендә, 1 майдан 4 майга кадәр һәм 8 майдан 11 майга кадәр дүрт көнлек ял көннәреннән торган ике чор каралган. Шул ук вакытта бу чорлар арасында өч эш көне була – 5 майдан 7 майга кадәр.
Әгәр хезмәткәр шулай да эштән китү вакытын кичектереп тора алмый икән, ул РФ Хезмәт кодексының 80 маддәсе нигезендә эштән китүенә ике атна кала эш бирүчегә хәбәр итәргә тиеш, дип өстәде белгеч.
«Бу кагыйдә бәйрәм көннәрендә дә гамәлдә. Эштән китәр алдыннан үтәлергә тиешле ике атналык эш вакыты календарь көннәрендә исәпләнә: май бәйрәмнәре алдыннан эштән китү турында гариза язган очракта май аендагы ял көннәре дә бу вакытка кертеләчәк», – дип йомгаклады Ветерков. Әгәр хезмәткәрнең соңгы эш көне ял чорына туры килсә, эш вакытының азагы буларак якындагы эш көне саналачак, дип өстәде ул.