Новосибирск шәһәрендә «Себер Сабан туе» төбәкара бәйрәме була
8 июньдә Новосибирскида зур һәм әһәмиятле мәдәни вакыйга — «Себер Сабан туе» төбәкара бәйрәме узачак. Чара Себердән һәм Россиянең башка төбәкләреннән кунаклар җыеп, традицияләрне, спортны, музыканы һәм халык иҗатын берләштерә. Бу хакта Бөтендөнья татар конгрессы матбугат хезмәте хәбәр итә.
Бәйрәмнең төп вакыйгаларының берсе билбау көрәше була, анда катнашучылар традицион төп бүләк — тере тәкә өчен көрәшәчәк.
Кунакларны Себер һәм Татарстан Республикасының иң яхшы иҗат коллективлары катнашында бай эчтәлекле концерт программасы көтә. Милли ярминкә, күргәзмәләр, мастер-класслар аеруча игътибарны җәлеп итәчәк, анда һәркем татар халкының бай мәдәниятенә кагыла ала.
Шулай ук бәйрәм территориясендә балалар һәм өлкәннәр өчен уен һәм спорт мәйданчыклары оештырыла — теләге булган һәркем үз көчен, җитезлеген һәм зирәклеген сыный алачак.
Быел Бөек Ватан сугышында Җиңүнең 80 еллыгына һәм Ватанны саклаучылар елына аерым игътибар бирелә. Бәйрәм хәтер, горурлык һәм буыннар дәвамчанлыгы билгесе астында узачак.
Оештыручылар бик күп сюрпризлар вәгъдә итә һәм барлык теләүчеләрне бәйрәмгә кушылырга чакыра, диелгән хәбәрдә.