Атна ахырына Татарстанда 24 градуска кадәр җылыта
Бу атнада Татарстанда температура сизелерлек күтәреләчәк. Бу хакта республиканың Гидрометеорология үзәге хәбәр итә.
Иртәгә, 13 майда, төнлә республиканың көнбатышында урыны белән бераз яңгыр явачак, һава температурасы 3-8 градус җылы була. Көндез явым-төшем көтелми, +18..+23 градус җылы була.
14 май төнендә явым-төшем көтелми. Әмма иртән һәм көндез көньяк-көнчыгыш циклонының атмосфера фронты якынаю сәбәпле, яңгыр, урыны белән уртача яңгыр фаразлана. Төнлә һава температурасы +7...+12, ә көндез +18...+23 градус җылы була.
Пәнҗешәмбе, 15 майда, төбәк атмосфера фронтының дулкын йогынтысында булачак – шул сәбәпле бераз яңгыр, кайбер җирләрдә уртача яңгыр явуы фаразлана. Көндез фронт күченү һәм атмосфера басымы үсү сәбәпле, яңгыр урыны белән генә явачак. Төнлә һава температурасы +5...+10, ә көндез +15...+20 градус була.
Метеорологларның якынча фаразлары буенча, җомга һәм шимбә көннәрендә, 16 һәм 17 майда, Татарстан югары атмосфера басымы йогынтысына эләгә. Сизелерлек явым-төшемнәр көтелми. Көндез температура +19...+24 градуска кадәр күтәреләчәк.
Алдарак «Татар-информ» майның икенче декадасында республикада һава торышы климатик норма чигендә булачак,- дип хәбәр иткән иде.