Зәй һәм Сарман районнарында «Аулак өй – көрәш» төбәкара проектының зона ярышлары була
Бүген 10.00-12.00 сәгатьтә мәктәпкәчә белем һәм тәрбия бирү учреждениеләре арасында Зәй муниципаль районы «Кояшкай» балалар бакчасында, 13.00 сәгатьтә мәктәп укучылары арасында Зәй муниципаль районы Ренат Фәрдиев исемендәге татар гимназиясендә «Аулак өй - көрәш» әдәби бәйгенең зона ярышлары була. Әдәби бәйгенең темасы «Габдулла Тукай иҗаты һәм тормыш юлы».
«Төбәкара проектның программасы аулак өй милли татар йоласы белән илһамланган әдәби ярышны үз эченә ала. Конкурсның максаты – ата-бабаларның бай мирасын саклап, милли бәйрәмнәр көннәрендә башкарыла торган җыр-биюле уеннары аша яшь буында туган телгә, мәдәнияткә хөрмәт тәрбияләү. Проект 2021 елдан бирле гамәлгә ашырыла. Әлеге кыска вакыт эчендә ул Татарстанны гына түгел, ә Россиянең төрле төбәкләрен, шәһәрләрен дә колачлый алды», - диде «Татар-информ»га проектның җитәкчесе Сәрия Закирова.
Аның әйтүенчә, иртәгә 10.00 сәгатьтә Сарман районы мәктәпкәчә белем бирү учреждениеләре арасында нәниләр өчен һәм 13.00 сәгатьтә мәктәп укучылары өчен Сарман гимназиясендә, 18.00 сәгатьтә Сарман районы мәдәният йортында иҗади командалар арасында «Аулак өй - көрәш» әдәби бәйгенең зона ярышлары була. Әдәби ярышта Сарман муниципаль районы һәм Әлмәт муниципаль районы командалары көч сынашачак.
- Халкыбызның йолаларын, гореф-гадәтләрен өйрәнү, татар әдәбияты классикларын уку максаты белән оешкан «Аулак өй – көрәш» төбәкара проекты Россиянең Мәдәният һәм Мәгариф министрлыклары, Татарстанның Мәгариф һәм фән, Мәдәният, Яшьләр эшләре министрлыклары, Татарстанның мәдәният ресурс үзәге, Бөтендөнья татар конгрессы, «Татмедиа» акционерлык җәмгыяте, «Сәләт» яшьләр үзәге, Татарстан Фәннәр Академиясе ярдәме белән гамәлгә куела.