Миңнеханов чыгарылыш кичәләрен һәм балаларның җәйге ялын оештыру буенча йөкләмәләр бирде
Татарстанның Хөкүмәт Йортында узган традицион шимбә киңәшмәсендә республика Рәисе Рөстәм Миңнеханов уку елы төгәлләнүгә һәм җәйге сәламәтләндерү кампаниясе башлануга кагылышлы йөкләмәләр бирде. Бу хакта Рәиснең матбугат хезмәте хәбәр итә.
Миңнеханов бүген Татарстандагы бөтен мәктәпләрдә дә бу уку елындагы соңгы кыңгырау чыңлый, 9 сыйныфны 46 323 укучы, ә 11 сыйныфны 15 300 укучы тәмамлый, диде.
Татарстан Рәисе муниципаль берәмлекләр башлыкларына һәм белем бирү оешмалары җитәкчеләренә уку елын төгәлләү чараларын югары дәрәҗәдә һәм барлык иминлек чараларын үтәп уздырырга йөкләмә бирде. Аның сүзләренчә, чыгарылыш имтиханнарын оештыруга аерым игътибар бирергә кирәк.
Шулай ук Рөстәм Миңнеханов быел республикада 154 526 бала өчен ял планлаштырылган, ул 1620 оешма катнашында оештырылачак, диде. 50 меңнән күбрәк бушлай юллама авыр тормыш хәлендә калган балаларга, шулай ук махсус операциядә катнашучыларның гаиләләрендәге балаларга, инвалид балаларга һәм әти-әни тәрбиясеннән мәхрүм калган балаларга биреләчәк.
Җәйге сәламәтләндерү кампаниясе республика бюджетыннан 2,5 млрд сумга һәм җирле бюджетлардан 12 млн сумга финанслана. Миңнеханов Татарстанның Яшьләр эшләре министрлыгына һәм муниципаль органнарга балалар ялын оештыра торган оешмаларның иминлеген, шулай ук сәламәтләндерү лагерьларында туклануны оештыруны һәм тискәре социаль күренешләрне кисәтүне контрольгә алырга кушты.
Моннан тыш, Рөстәм Миңнеханов бүген Лаеш районының Никольское авылында Каравон рус халык бәйрәме уза һәм ул Славян язуы һәм мәдәнияте көненә туры килә дип искәртте. Бәйрәмне Идел буе халыкларының традицион чаралары ачып җибәрә. Миңнеханов Татарстан Мәдәният министрлыгына һәм муниципаль берәмлекләргә бу һәм башка бәйрәмнәрне милли мәдәниятләрне һәм гореф-гадәтләрне исәпкә алып үткәрүне тәэмин итәргә, шулай ук җәмәгать тәртибен һәм иминлекне саклау чараларын күрергә кушты.
Шулай ук республика башлыгы «Аҗаган» хәрби-патриотик уеннарын оештыруга ярдәм итүчеләргә рәхмәт әйтте. Быел уеннарда 105 меңнән артык бала катнашкан һәм Миңнеханов үсеп килүче буынны патриотизм рухында тәрбияләү мөһимлеген әйтте.
Балалар ялын һәм белем бирүне оештыру «Яшьләр һәм балалар» илкүләм проекты максатларына туры килә.