Татар конгрессында Бөек Ватан сугышы тарихына багышланган китаплар тәкъдим ителде
28 майда Бөтендөнья татар конгрессында «Пермь крае һәм Татарстан Республикасы галимнәре һәм туган якны өйрәнүчеләре тарафыннан нәшер ителгән Бөек Ватан сугышы тарихына багышланган китапларны тәкъдим итү» дигән темага Бөтенроссия түгәрәк өстәл-конференция узды. Бу хакта Бөтендөнья татар конгрессының матбугат хезмәте хәбәр итә.
Бөтендөнья татар конгрессы Башкарма комитетының Татар төбәкчеләре белән эшләү комитеты җитәкчесе, Бөтендөнья татар конгрессының Милли шура әгъзасы, ТР «Татар төбәкчеләре җәмгыяте» Төбәк иҗтимагый оешмасы Советы рәисе Альберт Борһанов түгәрәк өстәлнең модераторы ролендә чыгыш ясады.
Бөек Ватан сугышында һәлак булган фронтовикның улы, «Пермь крае татар төбәкчеләре» төбәк иҗтимагый оешмасы рәисе Данир Закиров «Пермские татары в боях за Родину на фронтах ВОВ 1941-1945 гг. Историко-публицистическое и научное издание» дигән китабын тәкъдим итте.
Җыентыкны төзүче, проектның идея авторы, тарих һәм җәмгыять белеме укытучысы Альмира Шарифуллина «Дети. Война. Судьбы… Сугыш. Сабыйлар. Язмышлар…» китабы белән таныштырды.
Татарстанның Әлки районы Апак авылында туган, Бөтендөнья татар конгрессы Башкарма комитетының спорт программаларын гамәлгә ашыру бүлеге җитәкчесе Зөфәр Вәлиәхмәтов «Они ковали Победу в тылу» дигән яңа китабы турында сөйләде.
Татарстанның атказанган мәдәният хезмәткәре, шагыйрь Вазыйх Фатыйхов һәм югары квалификацион категорияле тарих укытучысы, ТР Журналистлар берлеге әгъзасы, ТР туган якны өйрәнүчеләр җәмгыяте советы әгъзасы Илфар Габдрахманов «Үлемсезлек / Бессмертие» китабын тәкъдим итте.
Конференция якташлык җәмгыятьләре вәкилләре, әйдәп баручы галимнәр, тарихчы-төбәкне өйрәнүчеләрнең чыгышлары белән дәвам итте.
Чара азагында түгәрәк өстәл-конференциягә йомгак ясалды.