Татар китабы йортында Лена Шагыйрьҗанга багышланган очрашу узды

Татар китабы йортында татар классикасы һәм заман әдәбияты турындагы «Лакуна» дип аталган лекторийлар циклы кысасында шагыйрә Лена Шагыйрьҗанга багышланган очрашу узды. Очрашуны «Лакуна» проектының авторы шагыйрь, драматург Луиза Янсуар алып барды.

Кунакларны Татар китабы йорты мөдире Айдар Шәйхин сәламләде, һәм «Лакуна» лекцияләр циклының максаты турында сөйләде.

«Без быел башланып киткән «Лакуна» исемле лекцияләр циклының икенче очрашуына җыелдык. Ул безнең әдәбият тарихында тирән эз калдырган һәм күпчелек очракта тиешенчә бүгенге көнгә кадәр бәяләнеп бетерелмәгән шәхесләргә багышлана. Безнең лекцияләр азрак искә алына торган, әмма күп тапкыр һәм бик зур югарылыкта искә алынырга лаеклы кешеләр турында. Беренче лекция Роберт Әхмәтҗанов турында булса, икенчесе Лена Шагыйрьҗанга багышланган. Шушы лецияләр аша без үзебезнең әдәбиятыбызга тиешле югарылыктан һәм тирәнлектән карарга өйрәтергә һәм өйрәнергә телибез», – диде ул.

Луиза Янсуар лекцияләрнең татар әдәбиятындагы бушлыкларны тутырып бетерергә тиешлеген билгеләде. Һәм очрашуларга әзерләнгәндә Милли музейда, архивта булган мәгълүмат туплануы һәм язучыларның мирасын саклаучы туганнары да җәлеп ителүен әйтте.

«Без замандашларыбызны һәм, гомумән, 21 йөз әдәбиятындагы шәхесләрне шундый аз беләбез. Кайберләрен интернет язмаларда урнашкан фикерләр буенча беләбез, ләкин зурдан кубып, китапханәләргә кереп, китапларын укып, өйрәнеп, тирәннән белеп бетермибез. Шуңа күрә Милли музей, архивларда булган материалларны туплап, мирасларын саклаучы туганнарыннан хатларын, көндәлекләрен җыярга булдык. Лекцияләр циклы «Лакуна» дип атала, чөнки ул «буш, тулып бетмәгән урыннар» дигәнне аңлата. Без шушы бушлыкларны тутырып, беребездән беребезгә импульслар җибәрү максатыннан эшләдек моны», – дип сөйләде ул.

Лекция барышында Лена Шагыйрьҗанның поэзиясе, шәхесе һәм иҗатының чорлары турында сөйләштеләр. Шулай ук очрашуда шагыйрәнең үз тавышы язылган тапшырулардан өзекләр, әңгәмәләре дә яңгырады.

«Иң тетрәндергеч, шәхси дә, шул ук вакытта фәлсәфи дә темаларга кагыла торган әңгәмәләрдән өзекләргә тукталырга булдык», – диде Луиза Янсуар һәм «Татарстан» радиосына әлеге өзекләрне биргән өчен рәхмәтен белдерде.

Очрашуда Татарстанның халык артисты, Лена Шагыйрьҗанның сеңлесе Луара Шакирҗанова да бар иде. Ул аның шигырьләреннән өзекләр укыды.