Матвиенко гаилә ипотекасын теркәлү урыны буенча гына бирергә тәкъдим итте
Федерация Советы Рәисе Валентина Матвиенко гаилә ипотекасын бирү механизмын үзгәртү инициативасы белән чыгыш ясады. Аның фикеренчә, программа акчалары бары тик ипотека алучы теркәлгән төбәктә торак сатып алу яки төзү өчен генә бирелергә тиеш. Аның сүзләрен ТАСС китерә.
Матвиенко РФ Хөкүмәте рәисе Михаил Мишустин белән очрашу вакытында белдергәнчә, дәүләт балалы гаиләләргә ярдәм итүгә шактый зур финанс ресурслары бүлеп бирә. Әмма, аның фикеренчә, ипотека бирүнең гамәлдәге тәртибен камилләштерергә кирәк.
Матвиенко узган ел статистикасына сылтама ясады: гаилә ипотекасы буенча кредитларның яртысыннан артыгы дүрт төбәккә туры килгән – Мәскәү, Мәскәү өлкәсе, Санкт-Петербург һәм Ленинград өлкәсе. Шул ук вакытта, спикер ассызыклаганча, кредитларның 40 проценттан артыгы Россиянең башка субъектларында теркәлгән кешеләргә бирелгән.
Ул искәрткәнчә, гадәти ипотеканы гражданнар илнең теләсә кайсы төбәгендә рәсмиләштерергә хокуклы. Әмма ташламалы гаилә ипотекасы, аның фикеренчә, инвестиция максатларында түгел, ә гаиләнең даими яшәү урынында торак шартларын яхшырту өчен файдаланылырга тиеш.
Моңа бәйле рәвештә Матвиенко хөкүмәт карарына үзгәрешләр кертергә, аны торак сатып алу яки төзү территориясен кредит алучы теркәлгән РФ субъекты белән чикли торган норма белән тулыландырырга тәкъдим итте.