Эксперт Самиев: 7 августтан соң банклар ташламалы ипотека шартларын яңадан караячак

Банклар ташламалы ипотека программалары (шул исәптән гаилә, Ерак Көнчыгыш һәм Арктик ипотека программалары) нигезендә югары компенсацияләр алган вакытлыча чара 7 августтан гамәлдән чыгарыла. «БизнесДром» агентлыгы башлыгы, финанс базарлары буенча «Россия терәге» комитеты рәисе Павел Самиев фикеренчә, бу ипотека кредитлары күләмен сизелерлек дәрәҗәдә киметергә мөмкин.

Февральдән август башына кадәр дәүләт банкларга гаилә ипотекасы өчен 3 процент пункты һәм Ерак Көнчыгыш һәм Арктика ипотекасы өчен 3,5 процент пункты өстәп түләде. Бу кредит алучылар өчен процент ставкаларын ташламалы дәрәҗәдә тотарга һәм шул ук вакытта банкларга керемен саклап калырга мөмкинлек бирде. Элек компенсацияләр түбәнрәк дәрәҗәдә иде. Алар Үзәк банкның төп ставкасына ташламалы программа нигезендәге соңгы ставканы алганнан соң билгеле бер өстәмә кушу формуласы буенча исәпләнә иде.

Самиев аңлатканча, хәтта арттырылган түләүләр белән дә бу программалар банкларга әллә ни керем китерә алмый иде. Өстәмә түләүләрне гамәлдән чыгарганнан соң, алар, мөгаен, мондый кредитларны бирми башлар яки кырысрак шартлар кертер.

Ул шулай ук искәрткәнчә, элек банклар төзүчеләрдән комиссияләр хисабына зыянны өлешчә каплый иде, әмма 2025 елның маеннан бу ысулны тыйдылар. Хәзер, өстәмә ярдәмнән башка, ташламалы ипотека программаларында катнашу банклар өчен икътисади яктан файдасыз булырга мөмкин.

Яңа субсидияләр булмаса, банклар кредит алучыларга карата таләпләрне кырысландырачак һәм мондый кредитларны рәсмиләштерү мөмкинлеген чикли башлаячак, дип өстәде Самиев.