Лилия Кәримуллина: Күгәрчен авылында шәл бәйләргә өйрәнмәгән кыз уңган килен саналмаган

Балык Бистәсе районы Күгәрчен авылына килен булып төшкән кыз, шәл бәйләргә өйрәнмәсә, уңган киленнәрдән саналмаган. Бу хакта бүген «Татар-информ» мәгълүмат агентлыгында «Бистә шәле» III республика хатын-кызлар кәсебе фестиваленә багышланган матбугат очрашуында әйттеләр.

Күгәрчен авылында һәрбер киленгә шәл бәйләргә өйрәтү традициясе бар. «Килен кайнанага – шәл, иренә һәм абыйсына перчатка бәйләргә тиеш булган», – диде Татарстан Мәдәният министрлыгының Татарстан мәдәният ресурсы үзәге директоры Алсу Мифтахова.

«Күгәрчен авылына килен булып төшкән кыз, шәл бәйләргә өйрәнмәсә, уңган киленнәрдән саналмаган», – дип өстәде Балык Бистәсе Башкарма комитетының мәдәният бүлеге мөдире Лилия ⁠Кәримуллина.

Фестивальнең төп режиссеры, Тинчурин театры артисты Илфак Хафизов та үз фикерләре белән уртаклашты. «Бу зур осталык сорый. Станокта түгел, кул белән бәйләнүе минем өчен могҗиза. Кул эше – хатын-кызның күңел җылысы. Гаилә учагы шул шөгыль аша да яшидер. Бу эшне дәвам итәргә һәм киләчәк буыннарга тапшырырга телиләр», – диде.

Алсу Мифтахова әлеге кәсепчелекне саклап калу мөһимлеген әйтте. «Бу феномен дип әйтер идем. Күгәрчен авылында олысы-кечесе – бөтен кеше бәйли. Фестиваль аркылы бу кәсепчелекне популярлаштыру мөмкин. 20 елларда бу шөгыльне авылга Зәйтүнә Шәрәфиева алып кергән һәм традициягә нигез салган. Авылның бөтен ирләре, хатын-кызлары, балалары да бәйли. Фестиваль мәйданчыкларының берсендә Күгәрчен авылы осталары бәйләү үрнәкләрен күрсәтәчәк», – дип билгеләп узды.