Мөмкинлекләре чикле сайлаучылар өчен яңа сервис эшли башлаячак
Көзге сайлаулар вакытында өйдә тавыш бирү турында гаризаны «Дәүләт хезмәтләре» порталы аша биреп булачак. ТР Үзәк сайлау комиссиясе рәисе Андрей Кондратьев «Сайлау ноктасы» иҗтимагый киңлегендә узган брифингта мөмкинлекләре чикле сайлаучыларның мәнфәгатен кайгыртып булдырылган яңа сервис турында сөйләде.
«Хәзер өйдә тавыш бирү ихтыяҗы турында бердәм Дәүләт хезмәтләре порталы аша хәбәр итәргә мөмкин. Моны 5 сентябрьдән эшләргә мөмкин булачак», - дип хәбәр итте Кондратьев.
Өйдә тавыш бирү турында гаризаны «Дәүләт хезмәтләре» порталы аша 5 сентябрьдән һәм 13 сентябрьдә 23.59 сәгатьтән дә соңга калмыйча бирергә мөмкин.
4 сентябрьдән 14 сентябрьгә 14.00 сәгатькә кадәр участок комиссиясенә язмача яки телдән (телефон аша) мөрәҗәгать итәргә, үтенечне үзең яки туганнарың, танышларың аша тапшырырга була.
ТР хезмәт, халыкны эш белән тәэмин итү һәм социаль яклау министры Эльмира Зарипова брифингта искәрткәнчә, әгәр сайлаучының фатирдан яисә өйдән чыгарга мөмкинлек бирми торган авыруы булса, аңа өйдә тавыш бирү мөмкинлеге тудырыла.
«Без урын өстендә ятучы, авыру сәбәпле үз фатирыннан чыга алмаучы кешеләр турында әйтәбез», - дип аңлатты министр.
Татарстанда 274 мең инвалид яши. Аларның 43 меңгә якыны – сәламәтлегендә җитди кимчелекләр булган кешеләр. Шуларның 20 меңе инвалид коляскасында хәрәкәт итә, 4 меңе протезлар куллана, 11 мең кешенең - ишетү, ә 8 меңенең күрү сәләте бозылган.
«Бу категорияләргә һәр сайлау участогында тавыш бирү һәм сайлауда катнашу хокукын тәэмин итү өчен тиешле шартлар тудырыла», - дип хәбәр итте Зарипова.
Татарстанда бердәм тавыш бирү көнендә, 14 сентябрьдә, ТР Рәисен, 7,5 меңнән артык муниципаль депутатны сайлаулар һәм 18нче Мәләкәс бермандатлы сайлау округы буенча ТР Дәүләт Советы депутатын өстәмә сайлаулар узачак.
ТР Үзәк сайлау комиссиясе Рөстәм Миңнехановны («Бердәм Россия») һәм Виталий Смирновны («Социаль гаделлек өчен Россия пенсионерлар партиясе») Татарстан Рәисен сайлауда кандидатлар итеп теркәде, шулай ук Руслан Йосыпов (ЛДПР) һәм Хафиз Миргалимов (КПРФ) та теркәлү өчен документларын тапшырды.