Атказанган укытучы Снегуров мәктәпләрдә өй эше бирүне гамәлдән чыгаруга каршы чыкты
Мәктәп укучылары өчен өй эшләрен башкаруны гамәлдән чыгарырга ярамый. Россия Федерациясенең атказанган укытучысы Александр Снегуров «Татар-информ»га шундый фикер әйтте.
Элегрәк Дәүләт Думасы Рәисе Вячеслав Володин укучыларга йөкләнеш зур булу сәбәпле, мәктәпләрдә өй эше бирүне гамәлдән чыгару мөмкинлеге турында фикер алышырга тәкъдим итте.
«Бу мәсьәләгә без ел саен диярлек берничә тапкыр әйләнеп кайтабыз. Тиздән 1 сентябрь, һәм бу хакта тагын да ешрак фикер алышачаклар. Мәктәптән теләсә нинди өй эше уртача булырга һәм балага артык йөкләнеш булмаска тиеш. Биремнәр балаларның мөмкинлекләренә карап һәм аларның яшенә карап бирелергә тиеш. Өй эшләренең максаты — балаларны артык йөкләү түгел, ә мәктәптән алган белемнәрне ныгыту», - дип ассызыклады Снегуров.
Эксперт билгеләп үткәнчә, өй эшенә таләпләр уку йорты тибыннан, укучыларның дисциплиналарын гомуми аңлаудан, аларның акылыннан чыгып куелырга тиеш.
«Кемгәдер шигырьне өйрәнү җиңел, кемгәдер мәсьәлә чишү җиңелрәк. Һәркем нинди дә булса эшне 10-15 минут эчендә эшли, ә кемдер - 1-1,5 сәгатьтә. Укучыларның дәресләргә әзерлеген, аларның яшен дә исәпкә алырга кирәк», - дип саный педагог.
Укытучыларга, бала әти-әнисе, әби-бабайлары яки дуслары ярдәменнән башка үзе башкара алырлык, адекват өй эшләрен бирү мөһим, дип йомгаклады Россиянең атказанган укытучысы.