Нигъмәтуллин: Татарстанда тормыш сыйфатын яхшырту өчен 48 программа гамәлгә ашырыла

Татарстанда социаль инфраструктураның һәм кешеләрнең тормыш сыйфатын күтәрүгә юнәлдерелгән 48 программа гамәлгә ашырыла. Бу хакта Татарстан Премьер-министрының беренче урынбасары Рөстәм Нигъмәтуллин Казанда «Кече шәһәрләр һәм тарихи җирлекләр үсеше» X Бөтенроссия форумында чыгыш ясаганда әйтте. Бу хакта «Татар-информ» хәбәрчесе Динара Прокопьева яза.

«10нчы форумның Казанда узуы символик мәгънәгә ия. Быел иҗтимагый киңлекләрне төзекләндерү программасына 10 ел булды», – диде беренче вице-премьер.

Татарстанның Уңайлы шәһәр мохите булдыру планында башка төбәкләр белән уртаклашыр нәрсәсе бар, дип саный Нигъмәтуллин. Республика хакимиятенең төп максатларының берсе – республика халкы өчен уңайлы шартлар тудыру, дип билгеләп үтте ул. Бу максатка ирешү өчен Татарстанда комплекслы рәвештә туры килә, зур мегаполисларда да, кече шәһәрләрдә дә социаль инфраструктураның сыйфатын һәм тормыш сыйфатын күтәрүгә юнәлдерелгән 48 программа гамәлгә ашырыла.

2013 елдан Татарстанда иҗтимагый киңлекләрне төзекләндерү программасы гамәлгә ашырыла. 2016 елдан республика шәһәрләрен үстерү институты эшли, параллель рәвештә Парклар һәм скверлар дирекциясе төзелде.

«Бу елларда бездә 450гә якын төзекләндерелгән территория булдырылды. Һәм, әлбәттә, без бу эшне дәвам итәргә планлаштырабыз», – диде Нигъмәтуллин.

Татарстан Рәисе Рөстәм Миңнеханов кушуы буенча «Безнең ишегалды» республика программасы эшләтеп җибәрелде.

«Шулай ук 2020 елдан «Безнең ишегалды» программасы гамәлгә ашырыла, аның кысаларында 5850 ишегалды территориясе төзекләндерелде, финанслауның гомуми лимиты 54 млрд сум», – дип сөйләде Татарстан Премьер-министрының беренче урынбасары.

Ишегалды территорияләрен төзекләндерү капиталь ремонт яки реконструкция белән генә тәмамланмый. Татарстанда уртак чаралар уздыру аша күршелек традицияләрен үстерәләр. Аларга ярдәм итү өчен «Курше фест» ишегалды фестивале оештырылды.