Фирдүс Тямаев Төркия белән Татарстан турында: Сәүдә итү һәрчак үсештә булырга тиеш
Төркия Республикасы белән сәүдә-икътисадый һәм инвестицион хезмәттәшлекне үстерүгә зур игътибар бирелә. Төркиянең Казандагы Генераль консулы Угур Йылмаз әйтүенчә, узган ел Татарстан белән Төркия арасында товар әйләнеше ике мәртәбә арткан һәм 5,3 млрд долларга җиткән. Татарстанның атказанган артисты, җырчы Фирдүс Тямаев та Төркия белән Татарстан арасындагы сәүдә өлкәсендә элемтәләрне хуплавын әйтте.
Фото: © «Татар-информ», Зилә Мөбәрәкшина
«Сәүдә итү һәрчак үсештә булырга тиеш. Татарстанда җитештерелгән продукцияне Төркиядә тәкъдим итәргә тиешбез. Һәрчак туганнар кебек яшәсәк иде. Төркиядә җитештерелгән сыйфатлы товарлар белән Татарстан халкы куллансын иде дип телим. Ике ел элек Антальяда милли бәйрәмебез Сабантуйда чыгыш ясадым, концерт куйган идек. Төркиядә яшәүче дусларыбыз безне бик җылы каршы алган иде», - дип билгеләп үтте җырчы дустанә мөнәсәбәтләр турында.
Төркиянең Казандагы Генераль консулы Угур Йылмаз Төркиянең берничә оешмасы Татарстанга инвестицияләр кертүен, әлеге эшчәнлекнең дәвам итүенә сөенүен әйтте.
Фото: © «Татар-информ», Зилә Мөбәрәкшина
«Автомобиль сәнәгате, станоклар төзү һәм металл эшкәртү, авыл хуҗалыгы, җиңел сәнәгать, төзелеш, IT кебек юнәлешләр буенча сәүдә үсеше перспективасы бар. Әйтик, Казанда «Turkuaz Design» керамик плиткалар кибетенең эшли башлавы да моның яхшы үрнәге булып тора. Россия бөтен дөнья буенча инвестицияләр кертү буенча да икенче урында тора. Бүгенге көндә Төркия белән берлектә Татарстанда 100ләп оешмага инвестиция кертелгән», - диде консул.
«Керамика өлкәсендәге мәйданчыкның да киләчәге өметле булыр дип уйлыйм, чөнки Татарстанда Төркиядән керамика плиткалары кайтарылып, тәкъдим ителгән башка кибет юк. Төркиядә иң алдынгы технологияләр буенча җитештерелгән керамика плиткалары турыдан-туры Татарстанга – Казанга кайтарылачак. Һәм без, Төркиянең Казандагы консуллыгы исеменнән, әлеге проектка теләктәшлек белдерәбез», - диде Угур Йылмаз.
Фото: © «Татар-информ», Зилә Мөбәрәкшина
«Turkuaz Design»ны гамәлгә куючылар - Озан Бинбога, Мехмет Камил Этдер, Артур Кубашев.
«Бер ел элек беренче тапкыр Татарстанга үзебезнең проект белән бизнеста эшли башлау максаты белән килдек. Бер ел дәвамында Татарстан базарын өйрәндек. Нәтиҗәсен күреп торасыз: «Turkuaz Design» дигән мәйданчыгыбыз эшли башлады. Бу безнең эшебезнең, проектыбызның башы гына. Әле бик озаклап бергәләп хезмәттәшлек итеп, эшләрбез дип уйлыйм», - диде Озан Бинбога.
Мехмет Камил Этдер фикеренчә, бүгенге вазгыятьне исәпкә алганда чит илләрдән, әйтик, Европадан, сыйфатлы продукцияне китертү җиңелләрдән түгел.
«Бер ел элек Татарстанда керамика өлкәсе бик үк үсеш алмаганын күрдек. Шунлыктан, Төркиядән төзелеш материалларын кайтартырга булдык. Төркиянең үзендә керамик плитка җитештерү заводлары бар. Күрәбез: Татарстанда ремонт ясаучылар бик күп. Төркиядә башка система: төзелеш компаниясе өйләрне, фатирларны ремонт ясап сата. Ә Казанда күп кенә фатирлар ремонт ясалмаган килеш сатыла, ә кешеләрнең сыйфатлы ремонт ясыйсылары килә. Бу да безнең өчен зур «плюс», - диде «Татар-информ»га Мехмет Камил Этдер.
Фото: © «Татар-информ», Зилә Мөбәрәкшина
Төркиянең «Анталья татарлары» җәмгыяте җитәкчесе Оксана Назарова фикеренчә, Татарстан Республикасы инвесторлар өчен алга киткән инфраструктура тәкъдим итә: махсус икътисадый зоналар, технопарклар, индустриаль, агросәнәгать парклары һ.б. «Татарстан чит ил инвесторларына заманча инфраструктура, салым өстенлекләре, сәяси тотрыклылык, көчле сәнәгать базасы, халыкара брендларның ышанычы һәм стратегик яктан уңайлы географик урын тәкъдим итә», – диде ул.