Саранскида Рухи-мәдәни үзәктә Коръәнне өйрәнү дәресләре башланды
Саранск шәһәрендә Рухи-мәдәни үзәктә Коръәнне өйрәнү нигезләре буенча дәресләр башланды. Тыңлаучыларның саны елдан-ел арта баруы сөендерә, өстәвенә яшьләр дә, өлкән буын кешеләре дә бар. Бу хакта Бөтендөнья татар конгрессы матбугат хезмәте хәбәр итә.
Курслар рухи үсешкә, ислам мәдәниятен тирәнтен өйрәнүгә һәм мәдәниятара диалогны үстерүгә юнәлдерелгән.
Программа исламның структурасын һәм төп принципларын билгели, Коръәнне дөрес укырга өйрәтә, аның традицияләре һәм ислам мәдәниятендәге әһәмияте белән таныштыра. Рухи-мәдәни үзәктә ике квалификацияле педагог эшли.
Алар кабул иткән заманча методология алымнары, традицион кыйммәтләрнең заманча белем белән ярашуы Коръәнне өйрәнүне һәркем өчен кызыклы һәм аңлаешлы итә, диелә хәбәрдә.