Ван Дейк "Ливерпул"нинг кетма-кет тўртинчи мағлубиятини изоҳлади
"Ливерпул" сардори Виржил ван Дейк "Брентфорд"га қарши ўйиндан сўнг журналистлар билан суҳбатлашди. Учрашув 2:3 ҳисобида якунланди.
"Ливерпул" Англия Премьер-лигасида тўртинчи ўйинда кетма-кет мағлубиятга учради. Жамоанинг сўнгги беш йил ичидаги энг ёмон серияси қайд этилди. Ван Дейк жамоа натижасидан жуда ҳафсаласи пир бўлганини айтди.
У "Брентфорд"нинг кучли томонларини билганини, аммо уларга қарши курашишда қийналганини таъкидлади. Футболчи ҳозирги вазиятни қабул қилиш оғирлигини, лекин олдинга қараб ҳаракат қилиш зарурлигини билдирди.
У жамоа "Кристал Пэлас"га қарши ўйинга жиддий тайёргарлик кўриши лозимлигини қайд этди. Ван Дейк жамоанинг фикрлаш тарзини тезроқ ўзгартириш ва муаммони ҳал қилиш муҳимлигини урғулади.
У ҳозирги пайтда мухлислар ёрдамига эҳтиёж катта эканини айтди. "Ливерпул" АПЛ жадвалида тўққиз турдан сўнг 15 очко билан олтинчи ўринда бормоқда.
Клуб мавсум давомида натижани яхшилаш устида ишлашни режалаштирмоқда.