Доннарумма: Агар танлаш керак бўлса, Холандни жамоамда кўрган бўлардим
“Манчестер Сити”нинг италиялик дарвозабони Жанлуижи Доннарумма яқинда берган интервьюсида жаҳон футболидаги икки юлдуз — Эрлинг Холанд ва Килиан Мбаппе ҳақида фикр билдирди.
Журналист ундан “Қайси бирини жамоангизда кўргингиз келар эди — Холандми ёки Мбаппеми?” деб сўраганда, Доннарумма жавоб беришдан аввал бир оз ўйлаб қолган.
«Эрлинг чапақай, шунинг учун у Килиандан анча фарқ қилади. Иккисига қарши туриш жуда қийин — ҳар бири ўз услубида жаҳон даражасидаги ҳужумчи. Шу сабабли, улардан бирини танлаш осон эмас. Аммо танлаш керак бўлса, мен Холандни ўз жамоамда кўришни хоҳлардим», — деди у.
Дарвозабоннинг бу фикри футболдаги иккала юлдузнинг ўзига хос жиҳатларини яна бир бор ёдга солди. Доннарумманинг таъкидлашича, Холанднинг жисмоний куч ва аниқ зарбалари ҳар қандай дарвозабон учун катта синов, Мбаппе эса тезлик ва дриблинг жиҳатидан ҳали ҳам тенгсиз.
Эслатиб ўтамиз, Жанлуижи Доннарумма 2021–2024 йиллар оралиғида Парижнинг “ПСЖ” клуби шарафини ҳимоя қилган ва ўша даврда Килиан Мбаппе билан бир жамоада ўйнаган. Улар биргаликда Франция чемпионлиги ва миллий кубок совринларини қўлга киритишган.
Ҳозирги пайтда эса Доннарумма “Манчестер Сити” дарвозасини қўриқламоқда. Унинг собиқ жамоадоши Мбаппе “Реал Мадрид” сафида, норвегиялик Эрлинг Холанд эса “Сити”да етакчи форвард сифатида майдонда порламоқда.
Ҳисоблар статистикаси ҳам икки юлдузнинг жорий мавсумдаги юқори формасини намоён этмоқда: Холанд 15 учрашувда 18 та гол урган ва 2 та голли узатма берган бўлса, Мбаппе 15 ўйинда 16 та гол ва 2 ассист билан жамоаси етакчисига айланган.
Мутахассислар фикрича, бу икки ҳужумчи ҳозирги футбол авлоди ичида гол уриш самарадорлиги бўйича алоҳида мавқега эга ва улар ўртасидаги рақобат жаҳон футболи учун янги “Месси — Роналду” даврини эсга солмоқда.