Гвардиола Арда Гулерга кўз тикди, "Реал" жавоби қандай?

Европа трансфер бозорини яна бир миш-миш қиздирди: «Манчестер Сити» устози Хосеп Гвардиола «Реал Мадрид»нинг ёрқин таланти Арда Гулерни ўз жамоасида кўришни жуда ҳам истаяпти. Defensa Central тарқатган маълумотга кўра, манкунианликлар Мадрид клубига ноодатий ва жуда катта шов-шувли алмашинув вариантни таклиф қилишга тайёр ҳам экан.

Гап шундаки, ушбу таклифга кўра 20 ёшли Арда Гулер Манчестерга йўл олса, «Сити»нинг марказдаги асосий устуни Родри Мадрид сафини тўлдириши керак бўлади. Қоғозда назарий жиҳатдан қизиқ бўлиб кўринган бу схема амалда деярли имконсиз, деб таъкидлайди манба.

«Реал Мадрид» раҳбарияти Гулерни клубнинг стратегик олий қадриятларидан бири, келажак учун «тегилмас футболчи» сифатида кўради. Ёш турк яримҳимоячиси ҳам ўз навбатида Мадридни тарк этиш фикридан йироқ – у «Сантьяго Бернабеу»да ўз номини тарихга ёзиш ниятида.

Шу орада Родрининг ҳолати ҳам бундай алмашинувга мутлақо мос келмайди. Сўнгги бир йил давомида марказий яримҳимоячи жиддий жароҳатлар билан курашяпти: аввал тиззасида оғир жароҳат олган бўлса, ҳозирда сон мушагидаги муаммолар сабаб кўплаб ўйинларни ўтказиб юбормоқда. Гвардиола унга ҳали ҳам асосий тактик қурол сифатида ишонади, аммо унинг соғлиғидаги ноаниқликлар жиддий хавотир уйғотмоқда.

Қисқаси, Гвардиоланинг Гулер ҳақидаги орзуси футбол газеталарининг саҳифаларини безаши мумкин, лекин амалда бу трансфернинг амалга ошиши деярли имконсиз. Мадридликлар ёш талантини сездирмай ҳимоя қилмоқда, Гулер эса келажагини айнан Испания пойтахтида кўрмоқда.