Казан 2026 елга әзерлек турында: урам чистартыла, чүп чыгарыла, медицина ярдәме күрсәтелә
Бу атнада бөтен ил күләмендә Яңа ел бәйрәмнәре башланды. Әмма бәйрәм көннәре – күңел ачу гына түгел, шәһәр хезмәтләренең ничек эшләвен тикшерү дә. Шәһәр хакимияте Яңа ел каникулларына ничек әзерләнгән? Бу хакта тулырак – «Татар-информ» агентлыгы материалында.
Кыенлыкларга карамастан, 2025 ел вакыйгаларга бай булды
Казан мэриясендәге 2025 елның соңгы эшлекле дүшәмбе киңәшмәсе шәһәрне Яңа ел бәйрәмнәренә әзерләүгә багышланган иде. Каникул вакытында кешеләрнең уңайлылыгы һәм иминлеге турыдан-туры бәйле булган шәһәр хуҗалыгының барлык мөһим өлкәләре дә кузгатылды.
Казан башкарма комитеты җитәкчесе Рөстәм Гафаров киңәшмә башланыр алдыннан билгеләп үткәнчә, кыенлыкларга карамастан, 2025 ел вакыйгаларга бай булды. Һәм Казан барлык тармакларда да диярлек яхшы нәтиҗәләр күрсәтте.
Киләсе елда Казанга ислам дөньясының мәдәни башкаласы статусында яшәргә туры киләчәк, бу өстәмә финанслар җәлеп итәргә мөмкинлек бирә, дип өстәде Гафаров.
Рөстәм Гафаров искәрткәнчә, киләсе елда Казанга ислам дөньясының мәдәни башкаласы статусында яшәргә туры киләчәк
Фото: kzn.ru
«Кирәкле материаллар һәм җиһазлар резервы әзерләнде»
Бәйрәмнәр вакытында торак-коммуналь хуҗалык өлкәсенә аерым игътибар бирелә. Казан башкарма комитеты җитәкчесенең торак-коммуналь хуҗалык мәсьәләләре буенча урынбасары Искәндәр Гыйниятуллин хәбәр иткәнчә, авария бригадалары махсус техника белән тәүлек буе кизү торачак.
«Кирәкле материаллар һәм җиһазлар резервы әзерләнде», - диде Гыйниятуллин.
Ул билгеләп үткәнчә, бәйрәм көннәрендә шәһәр халкының күпчелеге үз йортларында була, шуңа күрә ишегалларын һәм квартал эчендәге юлларны вакытында кардан чистарту аеруча мөһим. Бу максаттан шәһәрдә 1,4 меңгә якын ишегалды җыештыручы һәм 230 кардан чистарту машинасы эшләячәк, ә буран булган очракта 80 берәмлеккә кадәр өстәмә техника җәлеп ителәчәк.
Ул чүп-чарны чыгаруга аерым игътибар бирде, чөнки Яңа ел бәйрәмнәрендә аның күләме гадәттәге көннәр белән чагыштырганда арта. Бу максаттан Казанда 120 чүп ташу машинасы эшләячәк.
Гыйниятуллин шулай ук шәһәр халкын контейнер мәйданчыкларына керү юлларына машина куймаска өндәде һәм моның өчен 2 мең сум күләмендә административ штраф каралуын искәртте.
Яңа ел бәйрәмнәрендә Казанда 600 берәмлек махсус техника эшләячәген, ә кар күп яуган очракта бу сан икеләтә артачак
Фото: © «Татар-информ», Владимир Васильев
«Әгәр юлларда тәртип урнашуын телибез икән, аннан машиналарны алырга кирәк»
Казан башкарма комитеты җитәкчесенең төзекләндерү мәсьәләләре буенча урынбасары Игорь Куляжев та шундый ук мөрәҗәгать белән чыкты. Ул билгеләп үткәнчә, 19 декабрьдән халыкка кайсы урамнарның кардан чистартылачагы турында хәбәр итәләр.
«Урамнарны чистартканда юл буенда калдырылган транспорт еш кына җитди проблемага әверелә. Күпчелек очракта хәбәргә колак салалар, әмма Яңа Савин районы проблемалы булып кала», - дип сөйләде Куляжев.
Ул машиналарын рөхсәт ителмәгән урында калдырган автомобиль хуҗаларын административ штраф көтүен, әгәр автомобильләр юлдагы карны чистартырга комачауласа, аларны эвакуацияләргә дә мөмкиннәр, дип өстәде.
«Әгәр без юлларда тәртип урнашуын телибез икән, аннан машиналарны алырга кирәк», - диде Гафаров.
Шәһәрнең буранга әзерлеге турында сөйләгәндә, Куляжев Яңа ел бәйрәмнәрендә Казанда 600 берәмлек махсус техника эшләячәген, ә кар күп яуган очракта бу сан икеләтә артачагын әйтте.
Казанда җәмәгать транспорты 31 декабрьдән 11 гыйнварга кадәр ял көне графигы буенча эшләячәк
Фото: © «Татар-информ», Владимир Васильев
Казанның җәмәгать транспорты Яңа ел төнендә төнге икегә кадәр эшләде
Казанда җәмәгать транспорты 31 декабрьдән 11 гыйнварга кадәр ял көне графигы буенча эшләячәк. Шәһәр башкарма комитеты җитәкчесе урынбасары Илдар Шакиров шул хакта хәбәр итте.
«Яңа ел төнендә шәһәр җир өсте транспортының пассажирлар иң еш файдалана торган маршрутлары эше төнге икегә кадәр озайтылды», - дип сөйләде Шакиров.
Метрополитен 24.00 сәгатькә кадәр эшләячәк.
Ул билгеләп үткәнчә, 7 гыйнварда Раштуа бәйрәме уңаеннан махсус автобуслар биреләчәк. Казан Изге Ана иконасы чиркәвенә килүчеләрне бәйрәм литургиясе тәмамланганнан соң «КАИ» тукталышында автобуслар көтеп торачак.
Стационарлар һәм бала тудыру йортлары 31 декабрьдән 11 гыйнварга кадәр тәүлек буе
Фото: © «Татар-информ», Салават Камалетдинов
Медицина учреждениеләре ялларсыз эшләячәк
ТР сәламәтлек саклау министры урынбасары, Казанның Сәламәтлек саклау идарәсе башлыгы Илназ Әхмәдиев Яңа ел бәйрәмнәрендә медицина оешмаларының ничек эшләячәге турында сөйләде.
Әйтик, стационарлар һәм бала тудыру йортлары – 31 декабрьдән 11 гыйнварга кадәр тәүлек буе, поликлиникалар һәм хатын-кызлар консультацияләре - көн саен 9:00-17:00 сәгатьләрдә, ә стоматология 9:00-15:00 сәгатьләрдә эшләячәк.
Ул шәһәр травмпунктлары эшенә аерым тукталды. Әхмәдиев сүзләренчә, халыкны тәүлек буе эшли торган биш бүлек кабул итәчәк. Алар түбәндәге адреслар буенча урнашкан:
- Лечебная урамы, 7;
- Адоратский урамы, 30а;
- Фатих Кәрим урамы, 14/67;
- Мәүлетов урамы, 2;
- Бигичев урамы, 20.
Шәһәрнең Яңа ел алды чаралары узган локацияләрендә бер генә хокук бозу очрагы да теркәлмәгән
Фото: © «Татар-информ», Владимир Васильев
900дән артык полиция хезмәткәре һәм Росгвардия вәкилләре
Яңа ел бәйрәмнәрендә иминлекне тәэмин итүгә килгәндә, Россия Эчке эшләр министрлыгының Казан буенча идарәсе башлыгы Ринат Габитов сүзләренчә, Яңа ел каникулларында шәһәрдә 900дән артык полиция хезмәткәре, шулай ук Росгвардия вәкилләре эшләячәк.
Ул билгеләп үткәнчә, Яңа ел төнендә Эчке эшләр министрлыгының – 250, Раштуада 200гә якын хезмәткәре җәлеп ителәчәк.
Габитов шәһәрнең Яңа ел алды чаралары узган локацияләрендә бер генә хокук бозу очрагы да теркәлмәвен әйтте.
«Татар-информ», Александр Хевронин