Казан Россиянең миллионлы шәһәрләре арасында яшел үсентеләр саны буенча лидер булды
Казан Россиянең миллионлы шәһәрләре арасында яшел үсентеләр мәйданы буенча лидер булып тора. Бу хакта Казан шәһәр Думасының хисап сессиясендә Казан федераль университеты тикшеренүләренә таянып, Татарстан башкаласы мэры Илсур Метшин сөйләде.
Бүген төрле форматтагы яшел зоналар Татарстан башкаласында 39,4 мең га, ягъни шәһәр территориясенең 61 процентын алып тора. Чагыштыру өчен: Россиянең башка миллионлы шәһәрләре арасында 2024 елда шулай ук лидерлар рәтендә Пермь, Екатеринбург, Воронеж, Самара һәм Уфа бар иде, шул ук вакытта Мәскәү һәм Санкт-Петербург рейтингка кертелмәде.
«2012 елда, без «Яшел рекорд» проектын башлаганда, Казанда агачларга караганда машиналар күбрәк иде. Ул вакытта 225 мең яшел үсенте булса, машиналар саны 300 мең иде», - дип хәбәр итте Метшин.
Казанда иҗтимагый киңлекләрне төзекләндерү «Яшел рекорд» проекты старт алган 2012 елдан алып барыла. Шул вакыттан бирле шәһәрдә 673 мең агач утыртылган, Горький паркы, Черек күл, Горки-Әмәт урманы, «Аккош күле» урман паркы, Түбән Кабан яр буе һәм «Елмай» балалар паркын да кертеп, шәһәр халкының яраткан дистәләгән ял итү урыны яңартылган.
Соңгы биш елда Казанда җәмәгать урыннары саны 150 дән 170 гә кадәр артты, ә парклар һәм скверларның гомуми мәйданы 178 гектарга артты – 449 гектардан 627 гектарга кадәр.