Беляев Түбән Каманың гадәттән тыш хәлләргә әзерлеге турында: Һәркемгә уяу булырга кирәк
Чираттагы эшлекле дүшәмбедә Түбән Кама районы башлыгы Радмир Беляев шәһәрнең оператив хезмәтләренең Татарстанда беренче тапкыр кертелгән «Ракета һөҗүме куркынычы» режимы шартларында башкарган гамәлләрен бәяләде.
«Түбән Камада барлык оператив хезмәтләр югары әзерлек режимына күчерелде. Гомумән алганда, барлык җаваплы хезмәтләр оператив эшләде. Шәһәрдә сиреналар кушылды, IP-домофонлы подъезд ишекләре автомат рәвештә ачылды», – дип сөйләде Беляев.
Балаларны белем бирү учреждениеләреннән эвакуацияләү оешкан рәвештә узды, ә җәмәгать транспорты хәрәкәте режим гамәлдән чыгарылганчы туктатылды, дип билгеләп үтте ул. «Шул ук көнне эшкә анализ ясадык, нәрсәне көчәйтергә кирәклеген билгеләдек, башка районнардагы коллегаларыбызның тәҗрибәсен өйрәндек. Түбән Кама халкына уяу булулары һәм социаль челтәрләрдә оператив сигналлар җиткерүләре өчен рәхмәт», - дип өстәде район башлыгы.
Радмир Беляев мондый очракларга һәрвакыт әзер торырга кирәклеген ассызыклады. «Гади чор түгел. Һәркемгә һәрвакыт әзер торырга, уяу булырга кирәк», – диде район башлыгы.
Ул шулай ук эшмәкәрләргә һәм кешеләр күпләп җыела торган объектларның администраторларына мөрәҗәгать итте. «Кече һәм урта бизнес, сәүдә үзәкләре, җир асты паркинглары белән бәйле мәсьәләләр бар. Һәр объектның паспорты һәм мондый очракларда үтәлергә тиешле чараларның расланган регламенты бар. Кече һәм урта бизнес регламентны тиешенчә үтәргә тиеш», – диде Беляев.