Казанда Җәяүдән ату үзәге төзелешен Республика көненә тәмамлыйлар
Мәскәү районындагы «Тасма» спорт мәктәбе базасында республикада бердәнбер мәйданчык булган Җәядән ату үзәге төзелә. Яңа үзәктә ел әйләнәсе җәядән атарга өйрәнү дәресләре һәм ярышлар булачак. Төзелеш эшләрен Республика көненә тәмамларга планлаштыралар. Эшләрне шәһәр мэры Илсур Метшин тикшерде, дип яза Казан мэриясе матбугат хезмәте.
Җәядән ату спорты Татарстанда 2009 елдан бирле үсеп килә. Бу вакыт эчендә «Тасма» спорт мәктәбеннән 17 спорт мастеры чыкты, шулай ук тәрбияләнүчеләр арасында Россия беренчелеге һәм Универсиада җиңүчеләре бар. Бүгенге көндә иң яхшылар исемлегенә халыкара дәрәҗәдәге спорт мастеры Дарья Орешникова, Россия беренчелеге җиңүчесе Никита Вахрамеев һәм Россия җыелма командасы әгъзасы, Универсиада җиңүчесе Иван Мухрыгин керә.
«Тасма» спорт мәктәбе бик күп лаеклы чемпионнар тәрбияләп чыгарды, аларның тырышлыгы безгә күпсанлы медальләр һәм мактаулы исемнәр бүләк итте. Монда дус һәм тугры коллектив һәм көчле җитәкчеләр эшли. Җәядән ату үзәген ачкач, бу спорт төре белән кызыксынучы шәһәрлеләр саны да икеләтә артачак. Яңа комплекста башка спорт төрләрен үстерү өчен дә урын җитә – монда футболчылар, дзюдочылар, җиңел атлетика спортчылары да шөгыльләнә ала. Күнегүләр нәтиҗәле булсын һәм яңа чемпионнар барлыкка килсен өчен, барлык шартлар да тудырылган. Комлексны Республика көненә ачарга планлаштырабыз», – дип билгеләп үтте Илсур Метшин.
Яңа спорт үзәгенең беренче этажында ук белән ату мәйданы ясалачак, ул 50 метрга 90 метрны тәшкил итәчәк. Хәзерге вакытта «Тасма» спорт мәктәбендә тәрбияләнүчеләр киңлеге бары тик 6 метр булган залда шөгыльләнергә мәҗбүр. Яңа киңлек киләчәктә 18 һәм 70 метр ераклыктагы арага ату буенча җәйге һәм кышкы ярышлар уздырырга мөмкинлек тудыра.
Икенче этажда спортчылар өчен чишенү бүмәләре, ике тренерлар бүлмәсе һәм 70 квадрат метрлы тренажерлар залы булачак. Үзәк махсус техник җайланмалар белән җиһазландырылачак: анда укның очуын яздырган кадрларны акрынайтылган режимда карарга мөмкинлек бирәчәк камералар һәм ук белән җәяне һәр спортчының физик төзелешенә туры китереп ясау өчен махсус станоклар.
«Тасма» спорт мәктәбендә бүгенге көндә 200 яшь укчы җәядән ату дәресләренә йөри, әмма зал кечкенә булу сәбәпле берьюлы бары тик 25 кеше генә шөгыльләнә ала. Яңа бина спортчыларга күнегүләр ясау өчен җайлаштырылган мәйдан гына түгел, аның зурлыгы тәрбияләнүчеләр санын икеләтә арттыру мөмкинлек бирә.