“Барселонамен“ келісімшартқа отырған қазақстандықты “Астанаға“ алмаған: толығырақ
15 жастағы қазақстандық Кәрім Меңдіқанов пен оның әкесі Руслан Tengri Sport-қа берген сұхбат барысында ойыншының "Астана" футбол клубында қаралымнан өткенін, бірақ келісімшарт ала алмағанын айтып берді.
Сәуірде каталониялықтармен келісімшартқа отырған жас футболшы Оралда дүниеге келген, бірнеше жыл бұрын "Астанада" қаралымда болған.
"Ол жерде қаралымда болды, бірақ оны алмады. Бір ай бойы қаралымда жүрді", - деді ойыншының әкесі Tengri Sport-қа берген сұхбатында.
- Неге алмағандарын түсіндірді ме?
"Ештеңе түсіндірген жоқ, бапкер тарапынан кері байланыс болмады, сондықтан бізге жеке клубтарды жағалауға тура келді", - деді Руслан.
Кәрімнің өзі де бұл жағдай туралы пікір білдірді.
"Шыны керек, бәрі қалай болғаны нақты есімде жоқ, бірақ жаттығуларға барғаным, олармен бірнеше жаттығу өткізгенім анық есімде. Кейін олар хабарласамыз деген сияқты болды, бірақ сол күйі хабарласпады, осындай бір жағдай", - деп бөлісті футболшы.
Нәтижесінде 2022 жылы Руслан ұлымен бірге Испанияға кетіп, онда баласы бірнеше жыл жергілікті мектепке барып, кейін командалардың біріне қабылданды.
Фото © Tengrinews.kz / Әлімжан Аманжол
"Өтірік көп": "Барселонадағы" қазақстандықтың әкесі Испанияға бару жолы туралы
Tengri Sport тілшісімен әңгімелесу барысында Руслан Меңдіқанов ұлына еуропалық командадан орынды ақшаға алып беруге болады деп, оны бірнеше рет алдамақ болғанын айтты.
- Қазір көшіп келуді жоспарлап жүргендерге келер алдында бәрін мұқият зерттеуге кеңес берер едім. Кез келген адаммен келісе беруге болмайды. Алдап соққандар көп болды.
- Қай кезеңде алдады?
- "Ұлыңды орналастырамыз, бүйтіп-сүйтіп береміз" деп уәде береді. Менде сондай жағдай болған, бірақ кейін олармен жұмыс істеуді тоқтаттым. Кәрім жаттыға бастаған бойда қасыма отандастарымыз келіп, командаға орналастырып берейік деп айтатын. Тіпті "Барселонаны" емес, "Жирона" сияқты клубтарды ұсынатын.
Мәселе мынада - ол жаққа ақшамен кіру мүмкін емес. Әсіресе академияға ақшамен ешқашан бара алмайсың. Олар таланттарды өздері іздейді.
Көптеген ата-ана балаларын талантты деп санайды, сондықтан олар Испанияға келгенде, әлгі адамдар соны пайдаланып, өз қызметтерін ұсынады. Іс жүзінде іріктеу бұлай жүрмейді, сондықтан мен ешкіммен келісепеуге кеңес беремін.
Еске сала кетейік, Кәрім Меңдіқанов 2026 жылдың жазынан бастап "Барселонаның" жастар командасымен бірге жаттыға бастайды. Сәуірде бала алғаш рет Қазақстанның 16 жасқа дейінгі құрамасына шақырту алды. Tengri Sport футболшымен эксклюзив сұхбат жазды.