Қарағанды облысында дала өртін сөндіру жұмыстары жүріп жатыр
Бұқар жырау ауданындағы Суықсу, Шет ауданындағы Ақбауыр, Қарқаралы ауданындағы Бесоба және Жаңатоған ауылдарындағы өрт толық сөндірілген. Қарқаралы ауданындағы Ынталы ауылында өрттің таралуы тоқтатылды.
"Қазір Ақтоғай ауданындағы Ақши ауылының маңында, сондай-ақ, Қызылтау тауларының жетуі қиын бөліктерінде жекелеген өрт ошақтарын сөндіру жұмыстары жалғасып жатыр. Таулы жер бедері мен екпінді жел жұмысты қиындатып, өрттің таралуына әсер етіп отыр", - деп хабарлады ТЖМ.
Аумақты тексеру үшін әуеден бақылау жүргізілді. Жету қиын жекелеген учаскелерге қосымша күш пен техника жіберілген. ТЖМ мәліметінше, елді мекендерге, қыстауларға және егістік алқаптарға қауіп төніп тұрған жоқ.
"Жекелеген учаскелерге су себіліп жатыр, өрттің одан әрі таралуына жол бермеу және қалған ошақтарды толық сөндіру шаралары қабылданып жатыр", - деп нақтылады ведомство.
Жұмысқа ТЖМ мен жергілікті атқарушы органдардан шамамен 200 адам және 60 техника жұмылдырылған. Жағдай ТЖМ бақылауында. Қажет жұмыстар тәулік бойы жүргізіліп жатыр.