2027 жылға арналған ең төменгі жалақы мөлшері аталды

Қаржы министрлігі 2027–2029 жылдарға арналған республикалық бюджет жобасын жариялады. Құжатта Қазақстандағы 2027 жылға жоспарланған ең төменгі жалақы мөлшері көрсетілген, деп хабарлайды Tengrinews.kz тілшісі.
ЕТЖ қандай болады?
Бюджет жобасында 2027 жылы ең төменгі жалақы 85 000 теңге болатыны жазылған. Яғни 2026 жылмен салыстырғанда мөлшері өзгермейді.
ЕТЖ деген не?
Қазір Қазақстанда ең төменгі жалақы 85 мың теңге. Бұл – жұмыс беруші қызметкерге толық жұмыс айы үшін төлеуі тиіс ең аз сома. Яғни, ресми түрде ЕТЖ-дан аз төлеуге болмайды.
ЕТЖ жалақыға ғана әсер етпейді. Оған кейбір әлеуметтік төлемдер де байланысты. Мысалы:

Декреттік төлемдер. Олардың мөлшері әйелдің ресми табысына қарай есептеледі. Сондықтан жалақысы төмен жандар үшін ЕТЖ-ның өсуі төлемдердің де артуына септігін тигізуі мүмкін.
Бала бір жарым жасқа толғанға дейінгі күтімі бойынша төлем. Жұмыс істейтін ата-аналарға бұл төлем орташа табысты ескере отырып есептеледі. Ресми жалақы өскенде төлем де ұлғаяды.
Жұмысынан немесе еңбекке қабілеттілігінен айырылған жағдайдағы әлеуметтік төлемдер. Бұл төлемдердің мөлшері де ресми әлеуметтік аударымдарға байланысты.

ЕТЖ туралы не айтылды?
Кейінгі бір жылда Қазақстанда ЕТЖ тақырыбы бірнеше рет талқыланды. 2025 жылғы тамызда алдағы үш жылға арналған бюджет жасалып жатқанда, Үкімет ең төменгі жалақыны көтеру жоспарда жоқ екенін мәлімдеген болатын.
Сол кезде премьер-министрдің орынбасары – ұлттық экономика министрі Серік Жұманғарин ЕТЖ 85 мың теңге деңгейінде қалатынын айтты.
Алайда арада бірнеше ай өткенде бұл мәселе Парламентте қайта көтерілді. Депутаттар ең төменгі жалақыны 110 мың теңгеге дейін арттыруды ұсынды. Үкімет сол уақытта мәселе қаралып жатыр деп жауап берді.
2026 жылғы сәуірде ұлттық экономика бірінші вице-министрі Азамат Әмрин ЕТЖ-ны 150 мың теңгеге дейін жеткізу жоспары туралы хабарлады. Оның айтуынша, өсім бюджет кірісіне байланысты болады. Кейін Еңбек және халықты әлеуметтік қорғау министрі Асқарбек Ертаев аталған сома Қазақстан ұмтылуы тиіс мақсат ретінде қарастырылатынын айтты. Яғни, бұл көрсеткішке кезең-кезеңімен жету жоспарланып отыр.
Осылайша, кейінгі бір жылда Қазақстанда ең төменгі жалақыны көтеру мәселесі бірнеше рет көтерілді. Бірақ әзірге ЕТЖ-ны 85 мың теңге деңгейінде қалдыру жоспарланған.
Бұл әзірге тек бюджет жобасы екенін түсіну маңызды. Ол әлі Құрылтайда талқыланып, қаралуы тиіс, сондықтан көрсеткіштер өзгеруі мүмкін.