Тоқаев Мелониді Италия үкіметінің тарихи жетістігімен құттықтады
Қазақстан Президенті Қасым-Жомарт Тоқаев Италия премьер-министрі Джорджа Мелониді оның үкіметі ел тарихындағы ең ұзақ мерзімді болуымен құттықтап, Италия премьерінің екіжақты қарым-қатынасты дамытуға қосқан үлесін атап өтті, деп хабарлайды Tengrinews.kz.
Бұл туралы Мемлекет басшысы Х әлеуметтік желісіндегі парақшасында жазды.
"Премьер-министр Джорджа Мелониді оның үкіметі Италия Республикасы тарихындағы ең ұзақ мерзімді болуымен шын жүректен құттықтаймын", - деп жазды Тоқаев.
Президенттің пікірінше, Мелонидің парасатты әрі нық көшбасшылығы, ұлттық мүдде мен ел абыройын қорғауға деген айнымас адалдығы Италияның экономикалық өсімін сақтауға және оның әлемдік аренадағы позициясын нығайтуға ықпал етті.
"Мен оның Қазақстан мен Италия арасындағы достық және стратегиялық серіктестікті тереңдетуге қосқан үлесін жоғары бағалаймын және тығыз ынтымақтастығымыз жалғаса беретініне сенемін", - деп толықтырды Тоқаев.
Мемлекет басшысы премьер-министрдің жауапты қызметіне табыс, сондай-ақ Италияның өркендеуі мен ілгерілеуіне бағытталған істеріне сәттілік тіледі.
My warmest congratulations to Prime Minister @GiorgiaMeloni on her government becoming the longest-serving in the history of the Italian Republic. Her wise and strong leadership, steadfast commitment to defending Italy's national interests and dignity have sustained the… pic.twitter.com/vnE9tvyOLq
— Qasym-Jomart Toqayev (@TokayevKZ) September 4, 2026
2025 жылғы мамырда Тоқаевтың шақыруымен Мелони Қазақстанға ресми сапармен келген болатын. Президент оны Астана әуежайында қарсы алды.
Қазақстан Президенті мен Италия премьер-министрі Ақордада келіссөз жүргізді. Кездесу барысында тараптар сауда-экономикалық және инвестициялық ынтымақтастықты дамыту перспективасын талқылады.
Джорджа Мелони - 2022 жылғы 22 қазаннан бері Италия тарихындағы Министрлер кеңесінің төрағасы қызметін атқарған алғашқы әйел. Ол Сильвио Берлусконидің төртінші үкіметінде жастар ісі жөніндегі министр болған. 2014 жылдан бері "Италия бауырлары" партиясының, ал 2020 жылдан бері Еуропалық консерваторлар мен реформаторлар партиясының көшбасшысы.