Тоқаев Қазақстанға заңсыз шығарылған активтерді қайтаруға мүмкіндік беретін заңға қол қойды
Қазақстан Президенті Қасым-Жомарт Тоқаев сейсенбі, 6 қазанда республикаға Қылмыстық істер бойынша өзара құқықтық көмек туралы Еуропалық конвенцияға қосылуға мүмкіндік беретін заңға қол қойды, деп хабарлайды Tengrinews.kz Ақордаға сілтеме жасап.
"Мемлекет басшысы "Қылмыстық істер бойынша өзара құқықтық көмек туралы Еуропа конвенциясын ратификациялау туралы" Қазақстан Республикасының Заңына қол қойды", – делінген хабарламада.
Еуропа кеңесінің министрлер комитеті Қазақстанды 2025 жылғы жазда Қылмыстық істер бойынша өзара құқықтық көмек көрсету туралы Еуропалық конвенцияға қосылуға шақырған.
Сол кезде Бас прокуратура Қазақстанның осы халықаралық тетікке қосылуы конвенцияға қатысушы елдерге құқықтық көмек көрсету туралы сұрауларды орындау үшін берік құқықтық база қалыптастыруға мүмкіндік беретінін атап өткен. Оның ішінде Қазақстанмен құқықтық көмек көрсету жөнінде жеке екіжақты келісімдер жасамаған елдер де бар. Бұл әсіресе елден заңсыз шығарылған активтерді қайтару тұрғысынан маңызды.
"Келісімнің негізгі мақсаты – экстрадициялау, дәлелдемелерді беру, куәлар мен сарапшылардан жауап алу туралы сұрауларға, сондай-ақ қылмыстық қудалау мен қорғауға байланысты басқа да процестерге қатысты елдер арасындағы қылмыстық істер бойынша құқықтық көмек көрсету процесін жеңілдету және жеделдету", – деп хабарлады ведомство.
Қылмыстық істер бойынша өзара құқықтық көмек көрсету туралы Еуропалық конвенция – конвенцияға қатысушы елдер арасында қылмыстық сот ісін жүргізу саласында құқықтық көмек көрсету мәселелерін реттейтін халықаралық шарт.
Қазір Қылмыстық істер бойынша өзара құқықтық көмек көрсету туралы Еуропалық конвенцияға Еуропа кеңесіне мүше 46 мемлекет, сондай-ақ оған мүше емес төрт мемлекет – Израиль, Корея, Моңғолия және Чили қатысады.
Сілтемесіз жаңалық оқисыз ба? Онда Telegram желісінде парақшамызға тіркеліңіз!