Қазақстанда -11 градусқа дейін күн суытады

"Қазгидромет" синоптиктері 15, 16 және 17 қазанға арналған ауа райы болжамын ұсынды, деп хабарлайды Tengrinews.kz тілшісі.

Болжамға сәйкес, алдағы күндері Қазақстанда жаңбыр, қар жауып, көктайғақ болады және жел күшейеді деп күтіледі. Түнде кей өңірлерде ауа температурасы -11 градусқа дейін төмендейді.

Қай жерде жаңбыр мен қар жауады?

15–17 қазан аралығында Қазақстанның басым бөлігінде атмосфералық фронттардың өтуіне байланысты жаңбыр мен қар түрінде жауын-шашын болады деп болжанады. 15 қазанда елдің шығысы мен оңтүстік-шығысында кей жерлерде қатты жауын-шашын, ал шығыста көктайғақ күтіледі.

Республиканың орталығы мен оңтүстігінде жауын-шашын болжанбайды. Сондай-ақ ел бойынша желдің күшеюі, түнгі және таңертеңгі уақытта тұман күтіледі.

Қай өңірлерде күн суытады?

Қазақстанның солтүстігінде түнде температура -3…-8 градусқа дейін төмендейді. 17 қазаннан бастап күн 0…+8 градусқа дейін жылынады деп күтіледі. Күндіз температура +7…+12 градус болады.

Қостанай облысында түнде -1…-6 градус, күндіз +10…+17 градус болады деп болжанады, кейіннен температура сәл төмендейді.

Елдің шығысында түнде -3-тен -11 градусқа дейін суытады. Күндіз температура негізінен +3…+12 градус болады, ал облыстың шығысында -2 градусқа дейін төмендеуі мүмкін.

Қарағанды облысында түнде -1-ден -8 градусқа дейін, өңірдің оңтүстігінде +3 градус шамасында болады деп болжанады. Күндіз ауа райы біртіндеп +10…+15 градусқа дейін жылынады.

Ұлытау облысында түнде 0…+6 градус, өңірдің солтүстігі мен шығысында -3 градусқа дейін төмендейді. Күндіз ауа +10…+20 градусқа дейін жылынады.

Оңтүстік пен батыста ауа райы қандай болады?

Елдің батысында түнде +7…+15 градус, күндіз +17…+25 градус күтіледі.

Ақтөбе облысында түнде +1…+6 градус, ал өңірдің солтүстігі мен шығысында -1…-3 градус болады деп болжанады. Күндіз температура +15…+23 градусты құрайды.

Қазақстанның оңтүстігінде түнде +2…+10 градус, күндіз +15…+25 градус күтіледі.

Елдің оңтүстік-шығысында түнде температура 0…+8 градус, таулы аймақтарда -2-ден -7 градусқа дейін болады. Күндіз температураның аздаған ауытқуымен +10…+22 градус жылы болады деп күтіледі.

Сонымен қатар, 16 және 17 қазанға қараған түні елдің оңтүстік-шығысында 1–2 градусқа дейін үсік жүреді деп болжанады.

Қазақстанда қазан қандай болады?

Бұған дейін синоптиктер Қазақстандағы 2026 жылдың қазанына арналған ауа райы болжамын нақтылаған болатын. Күздің екінші айы күрт суытумен, жаңбырмен және қармен басталады, алайда кейін елге жылымық оралады. Оңтүстікте кей кезеңдерде температура +30 градусқа дейін көтерілуі мүмкін. Толығырақ осы жерден оқыңыз.