АЙГА КЫРЫН КАРАМА

 

Авыр энергетикалы көн. Бүген кеше үз нәфесенең теләк һәм коткыларына бигрәк тә бирешүчән.Тыелгысыз хисләр күңелсез вакыйгаларга китерергә мөмкин. Тәэсирләнүчән кешеләргә аеруча кыен. Алма, кәбестә, сарымсак ашарга ярамый, балан, мүк җиләге, кычыткан ашау файдалы.

 

Тонзиллит интектерсә

 

Тигез микъдарда кычыткан һәм нарат җиләге яфракларын, кылыч үлән тамырын, сары мәтрүшкә, эт тигәнәге, кыр наратбашы үләннәрен, нарат бөресен кушып, шуның 2 аш кашыгын термостагы ярты литр кайнар суга салалар, төн буена төнәтәләр, көненә 2 тапкыр чирегешәр стакан эчәләр, 2-3 тапкыр тамакны да чайкыйлар. Гел бал суырып йөрү, төнгелеккә бал һәм май салынган кайнар сөт эчү дә тамак авыртуын баса.

 

24 гыйнвар (якшәмбе). Рабигүл ахир аеның 14 нче көне. 16 нчы Ай тәүлеге. Ай Арыслан йолдызлыгында, 16.48 сәгатьтә калка, 7.32 сәгатьтә бата. 4 сәгать 47 минуттан тулы Ай. Көн озынлыгы 8.06 сәгать.

 

Тыныч, иҗади, уңышлы көн. Һәрнәрсәдә гармониягә омтылу, җан тынычлыгын саклау мөһим. Дулкынландыргыч очрашулар булырга мөмкин. Килешүләр төзү уңай нәтиҗә бирә. Кан авырулары кискенләшә. Беркемгә дә үпкә сакларга ярамый.

 

Остеопороздан –  сары мәтрүшкә

 

1 аш кашыгы сары мәтрүшкәне 1 стакан кайнар суга салып, 15 минут пешерәләр, 40 минут төнәтәләр. Сөзеп, 100 грамм бал һәм 1 аш кашыгы лимон согы кушалар, әйбәтләп болгаталар. Суыткычта саклыйлар. Остеопорозны кисәтү өчен, 1 аш кашыгы төнәтмәне ашарга 30 минут кала көненә 1 тапкыр, ә инде дәвалану өчен, 1 әр аш кашыгы төнәтмәне көненә 3 тапкыр эчәләр.

 

25 гыйнвар (дүшәмбе). Рабигүл ахир аеның 15 нче көне. 17 нче Ай тәүлеге. Ай Арыслан йолдызлыгында, 17.57 сәгатьтә калка, 8.02 сәгатьтә бата. 3 нче фаза. Көн озынлыгы 8.10 сәгать.

 

Мәхәббәт, иҗат, яшәү шатлыгы көне. Бернәрсә дә планлаштырмыйча, теләгән нәрсәләрне генә эшләү яхшы. Нерв һәм эндокрин системаларга, күзләргә игътибарлырак булу сорала. Үпкәләшкән кешеләр белән дуслашыр вакыт. Яшелчәләрне күбрәк ашау файдалы.

 

Ютәлдән дәва

 

Уртача зурлыктагы 1 әр бәрәңге, яшел алма, суганны эмальләнгән кәстрүлдәге 1 литр суда ярты сәгать пешерәләр, сөзеп, җылы шулпаны эчәләр. Ике тапкыр эчкәннән соң ук ютәл шактый басыла.

 

26 гыйнвар (сишәмбе). Рабигүл ахир аеның 16 нчы көне. 18 нче Ай тәүлеге. Ай Кыз йолдызлыгында, 19.06 сәгатьтә калка, 8.28 сәгатьтә бата. 3 нче фаза. Көн озынлыгы 8.13 сәгать.

 

Алдашу, ялганга бай көн. Бизләр системасы, бил, бөерләр, тире, сукыр эчәк зә­гыйфь. Мунчага бару, массаж ясату, ач тору, төрле дәвалану чараларын куллану файдалы. Кәеф төшәргә мөмкин.

 

Яран сихәте

 

Яран яфрагын беләктәге пульс ишетелгән урынга бәйләсәң, кан басымы нормальләшә, чигәгә куйсаң – баш өянәге басыла. Яран мае экзема, тимрәү, стоматит, невралгияне, төрле җәрәхәтләрне дәвалауда кулланыла. Май ясау өчен, 1 өлеш яран яфрагын 5 өлеш үсемлек маена салып, 2 атна төнәтәләр дә, сөзеп, суыткычта саклыйлар.

 

27 гыйнвар (чәршәмбе). Рабигүл ахир аеның 17 нче көне. 19 нчы Ай тәүлеге. Ай Кыз йолдызлыгында, 20.14 сәгатьтә калка, 8.50 сәгатьтә бата. 3 нче фаза. Көн озынлыгы 8.17 сәгать.

 

Авыр энергетикалы көн. Күп аралашмаска, күз тиюдән, чит тәэсирләрдән сакланырга кирәк. Бурычка алырга да, бирергә дә ярамый. Нерв системасы, эчәклек, арканың өске өлеше зәгыйфь.

 

Тез авыртканда

 

Парафиннан ясалган 2 шәмне эретеп, 4 катлы марляны шуңарда чылаталар да, авырткан тез башына куеп, өстеннән җылы шәл урыйлар. 10 көн рәттән шулай дәваланалар. Яисә һинд суганының 1 яфрагын ваклап, 1 чәй кашыгы балга кушалар, шуны сызлаган буыннарга ышкып, өстеннән полиэтилен һәм  җылы шарф урыйлар.

 

28 гыйнвар (пәнҗешәмбе). Рабигүл ахир аеның 18 нче көне. 20 нче Ай тәүлеге. Ай Үлчәү йолдызлыгында, 21.22 сәгатьтә калка, 9.11 сәгатьтә бата. 3 нче фаза. Көн озынлыгы 8.21 сәгать.

 

Үз-үзеңне танып-белү, уйлану, буйсыну, кичерү көне. Өйдә булырга тырышырга, гаиләгә игътибарны арттырырга кирәк. Тәкәбберлек күрсәтергә ярамый. Яңа белем җиңел үзләштерелә. Нерв системасы, сизү әгъзалары, кан тамырлары, ашказаны зәгыйфь. Ит ашауны чикләү хәерле. Канны чистарту уңай нәтиҗә бирә.

 

Кандагы шикәрне киметү

 

8-10 данә дәфнә (лавр) яфрагын термостагы 1 стакан суга салып, 1 тәүлек төнәтәләр, көненә 3-4 тапкыр, җылы килеш, ашарга 30 минут кала, чирегешәр стакан эчәләр. Дәва курсы – 3-6 көн.

 

29 гыйнвар (җомга). Рабигүл ахир аеның 19 нчы көне. 20 нче Ай тәүлегенең дәвамы. Ай Үлчәү йолдызлыгында, 22.27 сәгатьтә калка, 9.31 сәгатьтә бата. 3 нче фаза. Көн озынлыгы 8.25 сәгать.

 

Үткән көнгә бирелгән киңәшләр саклана. Ай Үлчәү йолдызлыгында чакта күмәк эш, килешүләр төзү, маркетинг кампанияләре үткәрү, бәхәсләрне хәл итү, корпоратив чаралар уздыру уңышлы була. Дошманлык күрсәтергә ярамый. Туган-тумачаны сөендерү, кунак чакыру өчен уңай вакыт.

 

Кәбестә кәтлите

 

1 килограмм кәбестә, 1 стакан сөт, 2 аш кашыгы манный, 100 грамм уылган сыр, 1 йомырка, тоз, төелгән кара борыч һәм мөшкәт чикләвеге, 2 аш кашыгы он яки сохари вагы, кыздырыр өчен үсемлек мае кирәк. Кәбестәне турап, сөттә 15 минут пешерәләр, аннары манный өстәп, болгаталар һәм сүрән утта тагын 10 минут пешерәләр. Бераз суынгач, йомырка, уылган сыр, тоз, борыч, мөшкәт чикләвеген кушып, яхшылап болгаталар, кәтлит ясап, онда яки сохарида әвәлиләр, үсемлек маенда әйләндерә-әйләндерә кыздыралар.