Астанада жаңа аурухана салынады: қашан ашылады және онда кімдер емделеді?
Жаңа орталық қай жерде орналасады және құрылыс қашан басталады?
Жаңа балалар ауруханасы Астанадағы Нұра ауданы, Тұран даңғылы бойында, Ұлттық шұғыл медицинаны үйлестіру орталығының (ҰШМҮО) аумағында бой көтереді.
200 төсек-орынға есептелген ғимарат орталықтың өзге бөлімшелерімен байланыстырылады. Бұл туралы бізге Ұлттық шұғыл медицинаны үйлестіру орталығының басқарма төрағасы Ержан Әділбеков айтып берді.
"Аурухананың ашылуы балаларға арналған шұғыл және мамандандырылған медициналық көмектің қолжетімділігін арттырады", - деп толықтырды ол.
Құрылыс 2027 жылдың басында басталып, 2028 жылдың желтоқсанында аяқталады деп жоспарланған.
Жаңа ауруханада қандай бөлімшелер жұмыс істейді?
Клиникада мынадай бөлімшелер ашылады:
балалар хирургиясы және іріңді хирургия;
неонатология, нейрохирургия және офтальмология;
травматология, ортопедия және урология;
оториноларингология, жақ-бет хирургиясы және гинекология.
"Сондай-ақ біз аллергология, токсикология, неврология, эндокринология, гастроэнтерология, кардиология, нефрология және пульмонология бейіндері бойынша мамандандырылған көмек көрсетуді жоспарлап отырмыз", - деді Ержан Әділбеков.
Орталықта жаңа туған нәрестелерге де көмек көрсетіледі: қажетті оталар жасалып, шала туған нәрестелер күтімі жүргізіледі және өмірінің алғашқы күндерінде анықталған аурулар емделеді.
Астанадағы болашақ Балаларға арналған шұғыл медициналық көмек орталығының макеті. Фото: Ұлттық шұғыл медицинаны үйлестіру орталығының (ҰШМҮО) баспасөз қызметі
Орталық қанша пациентті қабылдай алады?
Орталық жылына 8 900-ге жуық пациентті қабылдай алады, бірақ әзірге бұл - алдын ала есептеулер.
Ұлттық шұғыл медицинаны үйлестіру орталығының аумағында орналасуының арқасында жаңа балалар ауруханасы жедел жәрдем қызметімен және елорданың басқа да клиникаларымен тығыз іс-қимыл жасай алады.
Балалар бұл жерге жедел жәрдем көліктерімен және санитарлық авиация арқылы Астананың өзге ауруханаларынан, сондай-ақ Қазақстанның аймақтарынан жеткізіледі.
Бұған дейін біз Алматыда перзентхананың жаңа корпусы салынып жатқанын, ол ашылғаннан кейін қазіргімен салыстырғанда екі есе көп босанушыны қабылдай алатынын хабарлаған болатынбыз.