Тәулік бойы жұмыс істеген: Ақтөбеде есірткі дүкеніне арналған айырбастау пунктінің жолы кесілді
Ақтөбеде есірткі сататын интернет-дүкен үшін төлемдерді қабылдауды және ақша аударуды қамтамасыз еткен топтың қызметі тоқтатылды. Схемаға қатысушылар тәулік бойы жұмыс істеп, өзге тұлғалардың банк карталарын пайдаланған және түскен табысты криптовалютаға айналдырып отырған. Операциялардың жалпы сомасы 400 миллион теңгеден асты, деп хабарлайды Tengrinews.kz Қаржылық мониторинг агенттігіне сілтеме жасап.
Айырбастау пункті тәулік бойы жұмыс істеген
ҚМА мәліметінше, схеманы Ақтөбе тұрғыны ұйымдастырған. Ол әлеуметтік желілерде айырбастау тобын құрып, жұмысқа жеті сыбайласын тартқан.
Қатысушылар міндеттерді өзара бөліп, күндіз-түні ауысыммен жұмыс істеген. Интернет-дүкен операторлары сатып алушыларды тапсырыс ақысын төлеу үшін осы айырбастау пунктіне бағыттап отырған. Төлем расталғаннан кейін клиенттерге есірткі жасырылған орындардың координаттары хабарланған.
"Күн сайын айырбастау пункті арқылы 50-ден 70-ке дейін төлем операциясы жүргізілген. Қаражатты қабылдау үшін үшінші тұлғаларға - дропперлерге ресімделген 22 банк картасы пайдаланылды. Кейіннен алынған қаражат криптовалютаға айналдырылып, есірткі бизнесінің кураторлары бақылайтын әмияндарға аударылып отырған", - деп хабарлады ҚМА.
400 миллион теңгеден аса қаражат криптовалютаға аударылған
Аударымдардың жалпы сомасы 918 мың USDT-ден асты, бұл 400 миллион теңгеден астам сомаға тең.
Схеманы ұйымдастырушы қамауға алынды. Тергеу амалдары жалғасып жатыр. ҚР ҚПК 201-бабына сәйкес өзге ақпарат жария етуге жатпайды.
San-Andreas, Mooz және “Царство Аида“: Астанада есірткі дүкеніне қатысты айыпталушылар ұзақ мерзімге сотталды