874 миллион теңгеге арзандады: Қайрат Боранбаевтың Астанадағы бұрынғы спорт кешені сатылды
Астанадағы Қайрат Боранбаев мемлекетке өткізген Fitnation спорт кешені бағасы айтарлықтай төмендегеннен кейін сатылымға шығарылып, сатылды. Ғимараттың қаншаға өткені және фитнес-орталықтың әкімдік меншігіне қалай өткені туралы – Tengrinews.kz материалында.
Fitnation қаншаға сатылды?
e-Qazyna.kz электронды сауда порталында Астанадағы Fitnation спорттық-сауықтыру кешені сатылды.
Мәміле құны 2 миллиард 305 миллион теңгені құраған.
Кешен Тұран даңғылы, 4/1 мекенжайында орналасқан. Лот құрамына жалпы ауданы 4 мың шаршы метр болатын қосалқы құрылыстары бар ғимарат пен 510 бірлік жабдық, соның ішінде жаттығу құрылғылары мен спорттық аймақтардың жарақтары кірді.
Фитнес-орталықты сату туралы деректер. e-Qazyna.kz порталынан скриншот
Fitnation ғимараты. e-Qazyna.kz порталынан алынған фото
Бұған дейін Fitnation премиум-санаттағы фитнес-клуб ретінде жұмыс істеген. Кешенде жаттығу және кардио аймақтары, бассейндер, спа-кешен, сондай-ақ кеңселік және әкімшілік бөлмелер бар.
Фитнес-орталықтың бағасы қалай өзгерді?
Фитнес-орталықты тек екінші мәрте ғана сатудың сәті түсті. Кешенді аукцион арқылы өткізудің алғашқы әрекеті сәтсіз аяқталды. Бастапқыда Fitnation электронды тендерге 2 913 037 603 теңге бастапқы бағамен шығарылған болатын (бағалау құны 2,9 миллиард және теңгерімдік құны 1,7 миллиард теңге). Алайда 15 қазанға жоспарланған сауда-саттық өтінімдердің болмауына байланысты өтпеді.
Нәтижесінде әкімдік бағаны шамамен 874 миллион теңгеге төмендету туралы шешім қабылдап, 2 039 126 323 теңге бағасымен жаңа сауда-саттықты белгіледі.
Оңалту орталығы және жаңа иесіне қойылатын талаптар
Кешен мемлекетке өткеннен кейін Астана әкімдігі оны әлеуметтік қажеттіліктер үшін пайдаланды. Fitnation базасында ерекше қажеттіліктері бар балаларды оңалту шаралары ұйымдастырылды.
Қала билігі кешеннің спорттық-сауықтыру бағытын сақтауға уәде берді. Әкімдік сауда-саттық шарттарына арнайы талаптарды енгізді. Бес жыл ішінде жаңа иесі мыналарға міндетті болады:
Кешеннің негізгі мақсатын – дене шынықтыру-сауықтыру және қалпына келтіру жұмыстарын сақтау, сондай-ақ халықты спортпен шұғылдануға тарту.
Нысанды тек спорттық немесе дене шынықтыру-сауықтыру кешені ретінде ғана пайдалану.
Боранбаев Fitnation желісінен қалай айырылды?
Fitnation фитнес-клубтар желісі Қайрат Боранбаевқа қатысты қылмыстық іс бойынша шығынды өтеу аясында мемлекет меншігіне өтті.
2023 жылдың қыркүйегінде сот Боранбаевты "ҚазТрансГаз" АҚ қаражатын жымқырғаны және жылыстатқаны үшін 6 жылға бас бостандығынан айырды. Сондай-ақ сот оның мүлкін тәркілеу туралы шешім шығарып, мемлекеттік наградаларынан айыруды ұсынды.
Мемлекет пайдасына Боранбаевтан мына мүліктер тәркіленді:
Алматыдағы Esentai mall СОО мен Esentai tower бизнес-орталығының арасында орналасқан екіқабатты коммерциялық ғимарат, құны 686 миллион теңге;
Halyk bank шотындағы 1,3 миллиард теңге;
Halyk bank шотындағы 5,7 миллион доллар (2,7 миллиард теңге);
Halyk bank шотындағы 1,17 миллион доллар (560 миллион теңге);
Halyk bank шотындағы 756 миллион теңге;
Halyk bank шотындағы 193 миллион теңге.
Үкім шығардан бірнеше күн бұрын Боранбаевтың құны 90 миллиард теңгеден асатын активтерді оның ішінде: мұнай кен орнын, газ тарату компаниясын, сервис саласындағы кәсіпорынды, қонақ үй және сауда-ойын-сауық кешендерін, фитнес орталықтар желісін, кеңсе үй-жайларын және басқа да активтерді мемлекет меншігіне ерікті түрде қайтарған.
Сондай-ақ Қайрат Боранбаев Білім беру инфрақұрылымын қолдау қорына 30 миллиард теңге аударды. Осы объектілердің барлығы мемлекеттік органдар мен компаниялардың балансына берілетіні хабарланды, ал ақшалай қаражат білім беру инфрақұрылымын дамыту үшін пайдаланылады.
Айта кетейік, бұған дейін Қайрат Боранбаев табиғи газ импорты кезінде қаражатт
2023 жылдың қазанында келтірілген залал толық өтеліп, активтер мемлекетке қайтарылғаннан кейін сот Боранбаевтың жазасының өтелмеген бөлігін бостандығын шектеу жазасына ауыстырды.