Россиялеләр азык-төлеккә бәяләр артуны ничек бәяли?
Россиялеләр фикеренчә, 2015 елда Россиядә азык-төлеккә бәяләр сизелерлек арткан. Шулай да ел ахырында бәяләр күтәрелү процессы бераз акрынайган.
Әлеге сораштыруны Россиякүләм иҗтимагый фикерне өйрәнү үзәге оештырган. Анда Россиянең төрле төбәкләрендә яшәүче 1600 кеше катнашкан.
Сораштырудан күренгәнчә, агымдагы елда азык-төлеккә бәяләр артты дип санаучылар узган ел белән чагыштырганда шактый кимегән. 2015 ел башында бу фикер белән халыкның 50 проценты килешсә, быел андыйлар саны азрак. Әле алай гына да түгел, сораштырылучылар арасында азык-төлеккә бәяләр кимеде дип санаучылар да бар икән.
Азык-төлеккә бәя артты дип санаучылар, беренче чиратта, яшелчә һәм җиләк-җимешкә бәяләр күтәрелүдән зарлана. Андыйлар барча халыкның 82 процентын тәшкил итә. Иткә бәя күтәрелде дип санаучылар исә – 75 процент. Сөт продуктларына бәя артуны шулай ук шактый күп халык сизгән икән (72 процент).
Сораштырудан күренгәнчә, икмәккә бәя артты дип әйтүчеләр – 66 процент, шикәргә – 62 процент, макароннарга – 61 процент тәшкил иткән.
Азык-төлектән кала, халык торак-коммуналь түләүләрнең артуын ассызыклый. Андыйлар барча россиялеләрнең 74 процентын тәшкил итә. Халык шулай ук бензинга, автобус билетларына бәя күтәрелү турында әйткән.