Пабачыла свет унікальная кніга пра Слонім
Кніга Сяргея Чыгрына “Гістарычная мазаіка Слонімшчыны” выйшла ў менскім выдавецтве “Кнігазбор”.
Слонімшчына ва ўсе стагоддзі была насычана самымі разнастайнымі гістарычнымі падзямі. Гэтыя падзеі ў адной кнізе адлюстраваць проста немагчыма, ды і ніхто іх ніколі не апіша. Але асобныя імгненні тых падзей, якія адбываліся на слонімскай зямлі, а таксама помнікі, людзей, іх захапленні і працу, радасныя і сумныя жыццёвыя эпізоды паказаў Сяргей Чыгрын у гістарычных мініяцюрах і фотаздымках у сваёй новай унікальнай кнізе “Гістарычная мазаіка Слонімшчыны”, якая толькі што пабачыла свет у менскім выдавецтве “Кнігазбор”.
Кніга ўяўляе сабой гістарычную мазаіку Слонімшчыны. Дзякуючы ёй, чытачам будзе лёгка і цікава пазнаёміцца з мінулым і сучасным горада над Шчарай і яго ваколіцамі. Чаго не адлюстравана ў тэкстах – дапаўняюць паштоўкі, фотаздымкі і малюнкі. Іх у кнізе апублікавана больш за 300. Многія надрукаваны ўпершыню.
Кніга выдадзена на вельмі якаснай паперы, прыгожа і з густам аздоблена. Падобнага выдання пра Слонім раней не было.
Дарэчы, гэта ўжо не першая кніга даследчыка нашай гісторыі Сяргея Чыгрына са Слоніма. Пра родны горад і сваіх знакамітых землякоў ён ужо выдаў некалькі дзясяткаў кніг.
Аксана Шпак, Беларускае Радыё Рацыя