Інфляцыя ў траўні паскорылася і за пяць месяцаў 2019 года склала 3%
У траўні адносна красавіка цэны на харчовыя тавары выраслі на 0,1% (з пачатку года — на 3,1%), на нехарчовыя — на 0,6% (на 2,3%), на паслугі — на 0, 4% (на 3,6%).
У Беларусі паскорыліся тэмпы інфляцыі. Згодна са звесткамі Нацыянальнага статыстычнага камітэта, спажывецкія цэны ў траўні 2019 года ў параўнанні з красавіком выраслі на 0,3%, са снежнем 2018 года — на 3%.
У траўні адносна красавіка цэны на харчовыя тавары выраслі на 0,1% (з пачатку года — на 3,1%), на нехарчовыя — на 0,6% (на 2,3%), на паслугі — на 0, 4% (на 3,6%).
Адносна траўня 2018 года цэны выраслі на 6,2%.
Згодна з афіцыйным прагнозам Нацбанка, у 2019 годзе інфляцыя не перавысіць 5%, а згодна з ацэнкамі Еўразійскага банка развіцця — складзе 5,7%.
У травеньскім макраэканамічным аглядзе Еўразійскага банка развіцця адзначаецца, што „пакуль рана казаць аб фармаванні тэндэнцыі да запаволення інфляцыі, у тым ліку з-за захавання высокага росту заработнай платы” ў Беларусі. „У сувязі з гэтым мы чакаем часовае паскарэнне інфляцыі ў траўні—чэрвені 2019 года да 5,7—6,0% у гадавым выражэнні”, — адзначаюць аналітыкі ЕАБР.
Нацыянальны банк чакае, што ў другім квартале інфляцыя будзе вышэй за мэтавы ўзровень, але ў наступныя кварталы стане запавольвацца, заявіў старшыня праўлення Павел Калаур на брыфінгу 3 траўня ў Менску. Ён адзначыў, што ў першым квартале рызыкі, якія могуць паўплываць на паскарэнне цэн, крыху зменшыліся.
Інфляцыя ў Беларусі у 2018 годзе склала 5,6%.
belapan.by