Адбылося лёсаванне канкурсантаў „Басовішча”
У сёлетнім конкурсе маладых гуртоў удзельнічаюць пяць калектываў у наступнай чарговасці: АTESTA, HARMONIX COLLEGE, LUTY SAKAVIK, PAULINN, BARROKKA.
Адбылося лёсаванне чаргі выступу канкурсантаў фестывалю Басовішча-2019. У сёлетнім конкурсе маладых гуртоў удзельнічаюць пяць калектываў у наступнай чарговасці: АTESTA, HARMONIX COLLEGE, LUTY SAKAVIK, PAULINN, BARROKKA.
Лёсаванне ў прамым эфіры ў Facebook праводзілі музыкі гурта Re1ikt, бубнач якога Аляксандр Дземідзенка заклікаў усіх аматараў музыкі прыехаць на БАСы:
– Шаноўныя слухачы! Мы, гурт Re1ikt, шчыра вас запрашаем на гістарычную падзею, на тое, што мы будзем узгадваць яшчэ шмат гадоў, распавядаць сваім дзецям і ўнукам. Пра тое, як гэта крута адбылося. Мы ўсё ж такі не хочам да канца прыняць, што гэта апошняе „Басовішча”. Але калі гэта атрымаецца так, дык кожны, хто любіць беларускую культуру, беларускую музыку, мусіць там быць. Бо гэта культавы легендарны фестываль, які зрабіў вельмі шмат для беларускай сцэны.
Басовішча-2019 – фестываль музыкі маладой Беларусі пройдзе 19-20 ліпеня ў мястэчку Гарадок, што на Падляшшы. Сёлетні, 30-ты па ліку фестываль, па словах арганізатараў, стане апошнім. Конкурс маладых гуртоў на ім пачнецца ў 17:30 19 ліпеня па-польскім часе.
Яўген Скрабец, Беларускае Радыё Рацыя